Operatori i Shpërndarjes së Energjisë Elektrike ka shtuar borxhet në muajt e fundit edhe pse vendi gjendet në krizë. Sipas të dhënave të publikuara në faqen zyrtare të OSHEE evidentohet se, janë marrë 2 kredi të reja, në shumën totale prej 51.5 mln euro. Këshilli i Ministrave ka miratuar garancinë shtetërore në favor të 2 bankave për kontratën e kredisë të nënshkruar mes tyre dhe Furnizuesit të Shërbimit Universal, që është kompania që menaxhon proceduar e blerjes së energjisë, si dhe me OSHEE Group. Kredia e parë është nga Intesa Sanpaolo Bank, në shumën e 20 mln eurove, ndërkohë që 31.5 milion euro të tjera janë marrë nga Raiffeisen Bank.
Këto nuk janë kreditë e para, që janë marrë Brenda një periudhë të shkurtër kohore për sistemin energjetik në vend, pasi vetëm pak ditë më parë u miratuan garancitë shtetërore në favor të bankave edhe për 2 kredi të tjera, me një shumë totale prej 30 mln euro. Gjithashtu, para pak javësh u nënshkrua marrëveshja e huasë prej 50 mln euro, që do të përdoret për funksionimin e bursës së energjisë, si dhe konsolidimin e kompanive të krijuara nga ndarja e OSHEE-së.
Ndërkohë që, gjatë muajit tetor, ishte Operatori i Shpërndarjes së Energjisë Elektrike që mori një hua prej 70 mln euro nga Banka Evropiane për Rindërtim dhe Zhvillim, që do të shkojë për financimin e projektit për reagimin ndaj krizës së shkaktua nga COVID-19. Praktikisht, vlera totale e kredive të marrë deri më tani nga OSHEE arrin në 201.5 mln euro.
Discussion about this post