Presidentja e Kosovës, Vjosa Osmani, ka lëshuar deklarata të forta nga Tirana ndaj Bashkimit Europian, ku ndodhet për të marrë pjesë në Samitin e Komunitetit Politik Europian.
Osmani tha se BE-ja po lëshon mesazhe të këqija për rajonin tonë, duke thënë se po iu hapet dera atyre që shkojnë në Moskë te Putini dhe bllokohet Kosova. Sipas Osmanit, më me rëndësi se bisedimet me Serbinë janë me rëndësi bisedimet me BE-në, të cilat po pengohen sipas saj nga disa vende anëtare.
“Ka një bllokadë totale nga ana e BE-së, nuk vlerësohet puna jonë, nuk vlerësohen reformat e ndërmarra, nuk vlerësohet fakti që ne jemi 100% në përputhje me politikat e tyre sa i përket sanksioneve ndaj Rusisë, por edhe politikave të tjera. Për fat të keq po jepet një mesazh shumë i keq për rajonin tonë. Më shumë po iu hapet dera atyre që shkojnë në Moskë te Putini, se sa për ne që nuk shohim rrugë dhe alternativë tjetër veç BE-së. Më shumë kemi kërkesë sesa kemi shpresë. Kërkesat tona do të jenë të zëshme.
Më me rëndësi se sa bisedimet me Serbinë janë ato ndërmjet Kosovës dhe BE, siç e dini Kosova ka aplikuar për anëtarësim në BE para 2 viteve. Për fat të keq ende nuk është shqyrtuar për shkak të disa komplikimeve të panevojshme politike që krijohen nga disa shtete anëtare. Ka ardhur koha që përtej fjalëve të bukura që i jepen shteteve aspiruese për anëtarësim të ketë veprime konkrete.”, tha Osmani.
Vjosa Osmani kërkoi heqjen e masave ndaj Kosovës në mënyrë që të ulen në tryezën e bisedimeve si të barabartë.
Discussion about this post