Presidentja e Kosovës, Vjosa Osmani ka thirrur një takim të rëndësishëm politik, ku do të diskutohet dhe pritet të merret vendimi për caktimin e datës së zgjedhjeve lokale. Mediat në Kosovë raportojnë se takimi është planifikuar të mbahet më 5 qershor dhe sipas informacioneve, presidentja pritet të nxjerrë dekretin për shpalljen zyrtare të zgjedhjeve lokale në vend.
Pavarësisht se data ende nuk është zyrtarizuar, raportohet se zgjedhjet për Komuna pritet të mbahen më 19 ose 26 tetor të këtij viti. Partitë politike kanë nisur tashmë përgatitjet dhe kanë filluar të konfirmojnë kandidatët e tyre për disa nga komunat më të mëdha dhe më strategjike në vend.
Në Malishevë, Nisma Socialdemokrate do të garojë me Ekrem Kastratin, ndërsa në Deçan, kandidati i Aleancës për Ardhmërinë e Kosovës (AAK), Bashkim Ramosaj, do të përballet me dy kundërshtarë: Natyra Kuçi nga Partia Socialdemokrate (PSD) dhe Shkumbin Demalijaj nga Iniciativa e Deçanit, një ish-deputet i AAK-së. Në Klinë, kryetari aktual Zenun Elezaj nga AAK do të kërkojë një tjetër mandat, ndërkohë që flitet se Partia Demokratike e Kosovës (PDK) mund të garojë me Sokol Bashotën.
Ndërsa për Mitrovicën dhe Ferizajn ende nuk janë konfirmuar emrat e kandidatëve, në disa komuna të tjera situata tashmë është më e qartë. Në Pejë, LDK-ja do të garojë me Gazmend Muhaxherin, ndërsa në Lipjan me Imri Ahmetin – dy kryetarë aktualë që kërkojnë edhe një mandat të ri.
Discussion about this post