Pas takimit me krerët e partive politike, presidentja Vjosa Osmani ka folur për mundësinë e shtyrjes së zgjedhjeve lokale.
Osmani para mediave tha se krerët e partive nuk u pajtuan për shtyrjen e datës së zgjedhjeve dhe se do të respektoj qëndrimin e krerëve të partive, që zgjedhjet të mos shtyhen.
Në takim, Albin Kurti ka kërkuar shtyrjen e zgjedhjeve me pretendimin se do të ndikojë tek situata e pandemisë, ndërsa opozita ishte kundër.
Pas konsultimeve sot pasdite, Osmani vendosi mos të shtyhen, por ajo shtoi se kjo nuk do të thotë që pajtohet me këtë qëndrim.
“Para disa ditësh i kam shkruajtur Institutit dhe janë përgjigjur se në bazë të analizave mbajtja e zgjedhje paraqet rrezik për rritjen e rasteve me covid-19, prandaj është rekomanduar që të bëhet shtyrja e procesit zgjedhor deri në vlerësimin epidemiologjik të radhës. Një vlerësim është kërkuar edhe për hapjen e shkollave dhe kemi marrë përgjigje edhe për atë çështje”- tha Osmani.
“Mënyra e vetme për të shtyrë zgjedhje është dakordimi mes partive në pushtet dhe në opozitë. Ky është standard ndërkombëtar, pra si president e vendit e kam obligim të marrë vendime pasi t’i kem konsultuar këto subjekte. Përkundër rekomandimit të ekspertëve shëndetësorë, për ndikimin e procesit zgjedhor në situatën epidemiologjike, partitë politike nuk u pajtuan me shtyrjen e zgjedhjeve. Unë do ta respektoj këtë, por asesi nuk do të thotë se pajtohem me këtë. Data e zgjedhjeve mbetet ashtu si ka qenë.
