Presidentja e Kosovës, Vjosa Osmani këtë të premte është pritur në takim nga presidenti i Turqisë, Recep Tayyip Erdogan me të cilin ka biseduar për thellimin e marrëdhënieve mes Kosovës e Turqisë.
Osmani përmes një postimi në Facebook shkruan se takimi me Erdogan ishte përmbajtësor.
“Në një takim shumë përmbajtësor me Presidentin Erdogan, biseduam për raportet e shkëlqyeshme ndërmjet Republikës së Kosovës dhe Republikës së Turqisë dhe për mundësitë e thellimit të bashkëpunimit në shumë fusha”, shkruan Osmani.
Ajo shtoi se e ka falënderuar presidentin turk “për përkrahjen e jashtëzakonshme që Turqia i ka dhënë Kosovës si dhe për mikpritjen dhe organizimin në SEECP dhe Antalya Diplomatic Forum”.
