Kastrati ka marrë 260 milionë lekë nga Bardh Spahia për të mbushur me karburant makinat e punonjësve të Bashkisë Shkodër. Dy tendera në një ditë i ka dhënë kryebashkiaku Shefqet Kastratit dhe këto kontrata vihen menjëherë në zbatim pikërisht në kohën kur çmimet e karburanteve po fluturojnë lart. Tenderi i parë është me objekt “Blerje gazoil (Bludiesel) për nevojat e Bashkisë dhe të Institucioneve të Varësisë së Bashkisë”. Në dokumentet standarde të këtij tenderi vihet re se shuma që do të shpenzohet 240 milionë lekë për të blerë naftë për nevojat e Bashkisë dhe institucioneve vartëse.
Vetëm pak javë më parë Gijotina.com ka denoncuar një tender për blerje karburanti që Spahia ia dha pa garë Kastratit. Për të fshehur këtë gamë tenderash që po i jepen kësaj kompanie vetëm për karburant, këtë herë në dokumentet e tenderit është regjistruar si Autoritet Kontraktor Reparti i zjarrfikëses në Shkodër. Gjithsesi nafta sërish do të shkojë për punonjësit e bashkisë, pasi këtë e thekson edhe objekti i tenderit.
Në fund të dokumentit vihet re se kontrata është lidhur me datë 3 tetor, 2 ditë pasi Bordi i Transparencës rriti çmimin e naftës. Kjo do të thotë se, Bashkia Shkodër po i blen naftë Kastratit në kohë kur është më shtrenjtë dhe rrjedhimisht disa muaj më vonë do të hapet sërish tender për karburant. Pasi me këto çmime 240 milionë lekë nuk furnizojnë dot me naftë të gjitha makinat e punonjësve.
20 milionë lekë për benzinë
Më datë 3 tetor, Bardh Spahia ka lidhur një tjetër kontratë me Shefqet Kastratin. Bëhet fjalë për prokurimin me objekt “Blerje benzinë pa plumb për nevojat e Institucioneve të Varësisë së Bashkisë”, për të cilin është lënë në dispozicion fondi me vlerë 20 milionë lekë.
Edhe këtë tender Kastrati e ka marrë pa garë dhe në një periudhë kur benzina gjithashtu ka pësuar rritje, krahasuar me muajin shtator. Në shqyrtimin e dokumenteve evidentohet se tenderi është zhvilluar me një konkurrent të vetëm. Kjo lloj procedure bëhet në favor të një kompanie klienteliste dhe shënohet me “flamur të kuq” për risk të lartë korrupsioni.
Ndërkaq, paraja nuk pyet për ngjyrën politike. Kështu, edhe një bashki që e ka nën kontroll PD e Berishës, blihet përmes tenderave nga Shefqet Kastrati. Ky është i vetmi rast kur qeveria, domethënë Komisioni i Prokurimit, nuk ngre kartonin për shkeljet e zyrtarëve blu, sepse në mes është oligarku i paprekshëm nga ligjet.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post