Pa u ulur mirë në kolltukun e kryetarit të Bashkisë Himarë, Arqile Bollano ka firmosur një tender korruptiv. Më 22 maj 2024, është njoftuar prokurimi me objekt “Blerje karburant për mjetet e Bashkisë”.
Procedura është lënë e hapur deri më 26 qershor 2024, por u paraqit vetëm një ofertë. Bashkimi i operatorëve ekonomik “EROIL” sha dhe “DAS OIL” shpk kanë bërë propozimin me vlerë 136 milionë lekë nga 141 milionë lekë që është fondi limit.
Në këto kushte nuk ka mungesë konkurrencë dhe si rrjedhojë është pranuar një ofertë e shtrenjtë. Bollano duhej ta anulonte tenderin dhe të priste oferta më të përshtatshme, sepse mund të ketë edhe kompani të tjera të tregtimit të karburanteve të interesuara. Kështu u dërgonte një sinjal bizneseve se tenderi nuk është i paracaktuar dhe mund të futen në garë me ofertat e tyre. Nuk e dimë se çfarë urgjence ka pasur kryetari i Himarës, por në këtë prokurim është shkelur ligji.
Kështu në të njëjtën ditë më 26 qershor 2024 është mbyllur tenderin dhe më 3 korrik u bë publike kontrata e regjistruar në Agjencinë e Prokurimeve Publike.
Për këto shkelje ligjore, Open Data Albania pasi e ka analizuar, i ka vendosur “Flamur të kuq” këtij tenderi, që është shenja treguese e riskut të korrupsionit.
Tenderi i karburantit implikon në shkelje edhe Blerina Balën, paraardhësja e Bollanos, e cila kishte firmosur shpalljen e prokurimit. Po ashtu, nën kujdesin e saj është caktuar edhe grupi që ka përllogaritur fondin limit që përfshin afatin deri në 31 dhjetor 2024. Konkretisht me këtë fond do të furnizohen ~ 72 221 litra naftë dhe 16 000 litra benzinë që do të vlenin për 6 muaj.
Dhuratat e EROIL
Fituesi i tenderit nuk është i rastësishëm dhe po ashtu mungesa e konkurrencës. Kjo shpjegohet me faktin se EROIL e merrte çdo vit këtë tender nga Jorgo Goro.
Kështu, në vitin 2022, i është dhënë tenderi kësaj firmë me “Flamur të kuq”, në mungesë të plotë të garës. EROIL e bashkuar me “AZ Distribution” përfitoi me firmën e Goros 4 166 667,00 lekë për një afat 5 muaj.
Në vitin 2023, firma “AZ…” e mori sërish fondin e bashkisë për naftë në vlerën 12 499 941,00 lekë. Sërish për tenderin u “Flamur i kuq” për riskun e korrupsionit. E si të presësh që të afrohen operatorë të tjerë, nëse tenderi ishte paracaktuar për pronarët e këtyre kompanive Drini Kosova dhe Fatjon Mita?
Ndërsa në vitin 2024, është futur në pjesë një partner tjetër, kompania DAS OIL e Dritan Xhokaxhiut.
Gjithashtu vlen për t’u përmendur se njëra nga firmat, konkretisht “EROIL” sha me pronar Drini Kosovën, është një nga kompanitë që ka përfituar nga paratë e skemës së korrupsionit tek inceneratorët.
Siç duket në tabelën më sipër, EROIL është në listën e kompanive të lidhura me fondet e inceneratorëve, skandal i cili vazhdon të hetohet nga SPAK.
Çudira të tilla ndodhin në Himarë, ku bashkinë duket se e ka zënë “mallkimi” i kryetarëve të korruptuar.
Bashkia e Himarës posedon një makinë të shtrenjtë për drejtuesin. Kujtojmë se në vitin 2023, para largimit të Jorgo Goros, me të ardhurat e Bashkisë është blerë dhe fuoristrada e kryetarit me vlerë 50 milionë lekë.
Rikujtojmë se pas arrestimit të Jorgo Goros për shpërdorim detyre, në krye te bashkisë më 30 mars 2024 u komandua Blerina Bala. Por vetëm pas dy muajsh ajo dha dorëheqjen dhe u zëvendësua nga Bollano.
Paradaksalisht, Jorgo Goro që ndodhet në qeli për korrupsion, akuzohet se tjetërsuar disa hektarë tokë në Himarë për t’ia kaluar Bollanos.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post