Spitali “Shefqet Ndroqi” i njohur ndryshe si sanatoriumi i Tiranës ka reaguar lidhur me ngjarjen tragjike të regjistruar pasditen e sotme, ku një pacient u hodh nga kati i tretë i spitalit dhe për pasojë gjeti vdekjen.
Në reagimin për mediat, bëhet me dije se pacienti 75-vjeçar, M.K. ishte shtruar që prej të dielës tek “Shefqet Ndroqi” me sëmundje kronike obstruktive pulmonare, insuficiencë respiratore dhe hipertension arterial.
Spitali “Shefqet Ndroqi” deklaron se pacienti gjatë trajtimin në spital nuk ka shfaqur në asnjë moment probleme të shëndetit mendor. Ende nuk dihet se cila ka qenë arsyeja që e ka shtyrë 75-vjeçarin drejt këtij akti ekstrem.
Reagimi i spitalit “Shefqet Ndroqi”
“Ngushëllime të sinqerta familjes së pacientit 75-vjeçar, M.K, i cili ka ndërruar jetë në Spitalin Universitar “Shefqet Ndroqi”, pavarësisht kujdesit dhe përpjekjeve maksimale të ekipit mjekësor.
Pacienti u shtrua ditën e diel me sëmundje kronike obstruktive pulmonare, insuficiencë respiratore dhe hipertension arterial. Gjatë gjithë trajtimit, ai ka qenë nën monitorim të vazhdueshëm dhe nuk ka shfaqur në asnjë moment probleme të shëndetit mendor.
I shprehim ngushëllimet tona familjes dhe sigurojmë publikun se ekipi mjekësor ka ndjekur të gjitha protokollet mjekësore për trajtimin dhe kujdesin maksimal ndaj pacientit”.
Discussion about this post