Dhoma e Avokatisë ka vendosur t’i japë fund bojkotit të seancave gjyqësore, ndërsa paralajmëron ndjekjen e rrugës ligjore për kundërshtimin e gjobave të vendosura ndaj avokatëve nga Gjykata e Posaçme gjatë periudhës së protestës. Vendimi është bërë publik nga kreu i Dhomës së Avokatisë, Maks Haxhia, i cili bëri të ditur se Këshilli Kombëtar i Avokatisë vendosi pezullimin e bojkotit pas marrjes në dispozicion të vendimit të Gjykatës së Apelit.
Sipas Haxhisë, gjobat e vendosura nga GJKKO ndaj avokatëve gjatë periudhës së bojkotit, i cili nisi më 8 shtator, kapin vlerën e 250 milionë lekëve. Për këtë arsye, Dhoma e Avokatisë do t’i kundërshtojë ato përmes një padie gjyqësore. Haxhia theksoi se Dhoma e Avokatisë ka qenë e angazhuar që në fillim për zgjidhjen e konfliktit në përputhje me ligjin, duke kritikuar mënyrën se si është trajtuar situata nga Gjykata e Posaçme.
Ai bëri të ditur se vendimi për ndërprerjen e bojkotit do tu komunikohet të gjithë avokatëve, ndërsa paralelisht do të vijojë beteja ligjore për shfuqizimin e gjobave.
“Duhet ta godasim në rrugë gjyqësore. Sot na u vu në dispozicion vendimi i Gjykatës së Apelit. Në këto kushte, ky organ vendimmarrës i bën prezente të gjithë situatën dhe të kaluarën, të gjitha përpjekjet tona në zgjidhjen e këtij konflikti. Dhoma e Avokatisë ka qenë që në ditët e para. Kemi qenë dhe jemi që çdo gjë të zgjidhet në përputhje me ligjin. U përdor autoriteti i karriges dhe nuk është fare normale që një vend kaq i vogël të ndiqet me autoritetin e karriges, që është mënyra më e keqe për të transmetuar një komunikim. Duke qenë përpara këtij realiteti, Këshilli Kombëtar i Avokatisë vendosi: Pezullimin e ndërprerjes, për shkak të vijimit të çështjes së këtij vendimi, të ndërpritet bojkoti, duke iu komunikuar kolegëve për këtë vendim. Do të bëjmë padi pasi GJKKO ka vendosur 250 milionë lekë gjoba pas bojkotit që nga 8 shtatori deri më sot“, tha kreu i Dhomës së Avokatisë Maks Haxhia.
gijotina.com/
Discussion about this post