Komisioni i Ligjeve miratoi sot ndryshimet në ligjin për Gjykatën Kushtetuese. Ndryshimet u miratuan me 12 vota pro, 1 abstenim të Fatmir Xhafajt dhe 1 votë kundër nga ana e Oerd Bylykbashit.
Ndryshimet kanë të bëjnë me rritjen e pagave të gjyqtarëve të Gjykatës Kushtetuese dhe Komisionit të Posacëm të Apelimit.
Zv.ministri i drejtësisë, Klajd Karameta, i pranishëm në komisioni e konsideroi këte kërkesë si një synim për garantimin e një trajtimi dinjitoz për punën e gjyqtarëve dhe garanci për pavarësinë në punën e tyre.
Gjatë diskutimeve në komision, deputeti socialist Fatmir Xhafaj edhe pse deklaroi se është pro rritjes së pagave shfaqi rezerva duke e krahasuar rolin e gjyqtarëve të Gjykatës Kushtetuese me Gjykatën e Lartë.
Ai theksoi se nuk duhet të ketë një diferencë kaq të madhe pagash mes gjyqtarëve të Kushtetues dhe atyre të GJKKO dhe Gjykaës së Lartë që gjykojnë krimin dhe korrupsionin.
“Një gjyqtar i Gjykatës Kushtetuese merr dyfishin e pagës së gjyqtarëve të Gjykatës së Lartë. Një gjyqtar i Kushtetueses i bie të marrë 644 640 lekë dhe një i GJKKO që gjykon nga mëngjesi deri në darkë i bie të marrë 376 380 lekë. Nuk jam kundër rritjes së pagave, gjyqtarët e Gjykatës Kushtetuese të kenë pagë më të lartë, por personalisht nuk e kuptoj si është ndërtuar e gjitha kjo, ky përpjesëtim kaq i madh dhe fakti që këta paskan një vështirësi të madhe në punë mbi këta që gjykojnë krimin, korrupsionin që hetojnë dhe gjykojnë edhe këta për korrupsion”, tha Xhafaj.
Deputeti i Partisë Demokratike, Oerd Bylykbashi u shpreh kundër rritjes së pagave për gjyqtarët e Gjykatës Kushtetuese.
“Mbas këtij favori nga Qeveria, Kushtetuesja nuk do të kalojë asgjë. Ndryshimet kërkojnë shumicë të cilësuar prej 84 votash, ndaj duhet bashkëpunim mes mazhorancës dhe opozitës”, tha Bylykbashi.
Nuk dihet nëse në sallën e Kuvendit do të arrihen të bëhen 84 votat e nevojshme për të miratuar nivelin e ri të pagave për anëtarët e Kushtetueses. Partia Socialiste e drejtuar nga Edi Rama ka 74 mandate dhe nëse i shtohen edhe 3 deputetët e PSD së Tom Doshit shkohet në 77 mandate. Për të miratuar ligjin duhet shumica e cilësuar prej 84 votash, që ose do të detyrojë Qeverinë të ulet në diskutime me opozitën, e cila kundërshtoi draftin, ose këto vota do të “peshkohen” mes grupimit të deputetëve që kanë si drejtues Lulzim Bashën.
Discussion about this post