Akademia e Forcave të Armatosura (AFA) ka reaguar zyrtarisht përmes një deklarate publike, duke përgënjeshtruar akuzat e bëra në media në lidhje me pagesat e kryera ndaj Presidentit të Republikës, njëkohësisht Komandant i Përgjithshëm i Forcave të Armatosura, Sh.T.Z. Bajram Begaj.
Në deklaratë, AFA sqaron se Presidenti Begaj, në funksionin e tij të mëparshëm si mjek ushtarak, ka qenë pjesë e ekipeve të kërkimit shkencor ushtarak dhe ka udhëhequr tema doktorature gjatë viteve 2013–2018, në bashkëpunim me një staf akademik prej 15 profesorësh.
Sqarim mbi pagesat
Në lidhje me pagesat e përfolura, AFA thekson se bëhet fjalë për detyrime të prapambetura financiare, të cilat janë shlyer në mënyrë të barabartë dhe transparente për të gjithë personelin akademik të përfshirë në procesin e kërkimit shkencor gjatë asaj periudhe.
“Pagesat janë kryer në përputhje me legjislacionin në fuqi dhe aktet nënligjore që rregullojnë arsimin e lartë dhe kërkimin shkencor,” – thuhet në deklaratë, duke shtuar se procesi është dokumentuar plotësisht dhe është i verifikueshëm nga çdo institucion kompetent.
Akademia thekson se mbetet e hapur për çdo verifikim nga organet përgjegjëse dhe u bën thirrje mediave të shmangin keqinformimin, duke raportuar mbi bazën e fakteve të verifikuara.
Ky reagim vjen pas raportimeve mediatike që ngritën pikëpyetje mbi legjitimitetin e pagesave të kryera ndaj Presidentit aktual, për punë akademike të kryer në të kaluarën.
Discussion about this post