I dërguari special i SHBA-së për dialogun Kosovë- Serbi, Gabriel Escobar do të vizitojë sot Kosovën. Në kuadër të intensifikimit të dialogut, diplomati amerikan sot në orën 08:45 do të takohet me presidenten Vjosa Osmani. Pas takimit do të ketë edhe deklaratë për media.
Përveç liderëve institucionalë, Escobar do të takohet edhe me përfaqësuesit e partive opozitare. Kjo është hera e dytë brenda disa javësh, që Escobar takon partitë opozitare.
Herën e kaluar në Kosovë, Escobar ishte bashkë me evropianin Miroslav Lajçak. Ky i fundit javën e kaluar ka qëndruar në Prishtinë, ndërsa dje ka vizituar Beogradin. Në dy takimet me kryeministrin Albin Kurti dhe presidentin serb, Aleksander Vuçiç, Lajçak ka thënë se temë e diskutimit kanë qenë targat dhe energjia.
Javëve të fundit janë intensifikuar përpjekjet e liderëve botërorë sa i përket bisedimeve Kosovë –Serbi.I fundit ishte sekretari amerikan i Shtetit, Antony Blinken, i cili bisedoi përmes telefonit me kryeministrin Kurti dhe me presidentin Vuçiç. Në këtë proces janë angazhuar edhe kancelari gjerman, Olaf Scholz dhe presidenti francez, Emmanuel Macron, të cilët kanë dhënë një propozim për marrëveshjen dypalëshe.
Discussion about this post