Paketa fiskale e prezantuar nga qeveria për vitin 2022, nuk është e konsultuar me Dhomën e Tregtisë dhe Industrisë në Tiranë. Në një analizë që i kanë bërë kësaj paketa, Dhoma e Tregtisë dhe Industrisë thotë se ndryshe nga sa është kërkuar që të ketë një paketë të tretë mbështetëse për biznese pas goditjes që morën nga pandemia po përballen me rritje të barrës fiskale.
“Këto propozime për rritje të barrës fiskale për sipërmarrjen, vijnë në një situate kur sipërmarrja akoma vuan pasojat e shkaktuara nga pandemia dhe kur ne përfaqësuesit e saj i kishim kërkuar qeverisë një pakete të trete të ndihmës që nuk u ofrua nga ana e saj. Po te marrim ne konsiderate gjithashtu edhe krizën globale te rritjes se çmimeve, ne ballafaqohemi me një rritje tjetër te barrës fiskale nga qeveria. Janë 4 propozime për ndryshime ligjore, qe nga vete relacionet përkatëse të tyre, vijnë më tepër si një obligim i qeverisë ndaj rekomandimeve te bëra nga FMN-ja; DHTI- Tiranë, shpreh mendimin se shpërndarja e informacionit paraprak nga Ministria e Financave dhe Ekonomisë për këto ndryshime ne ligjet fiskale, nuk mund te quhet i ezauruar, pa bërë një analizë të thelluar dhe propozime që duhet të vijnë nga sipërmarrja në kuadër të një pakete të plotë fiskale”, thuhet në analizën që ata kanë bërë.
Ndryshimeve që janë parashikuar në ligjin për TVSH-në, ku parashikohet vendosja e TVSH 10% për inputet bujqësore, Dhoma e Tregtisë dhe Industrisë në Tiranë shprehet se do të rriste kostot për prodhuesit e do të rriste çmimet në treg.
“Lidhur me inputet bujqësore, duke vendosur TVSH me 10%, nuk mund te konsiderohet lehtësi fiskale, por një shtesë barre takse për inputet bujqësore, që do të ndikojnë në rritjen e çmimit të shitjes së tyre nga ana e shoqërive të tregtimit, qe është në dëm të fermerëve, me pasoja në koston e çdo produkti bujqësor dhe për rrjedhojë me ndikim në rritjen e çmimeve në treg për produkte bujqësore” – argumenton më tej Dhoma e Tregtisë dhe Industrisë.
Gjithashtu edhe Këshilli i Agrobiznesit në Shqipëri ka shprehur se nuk janë thirrur për konsult sa i përketë paketës fiskale. Kryetari i Agrobiznesit Agim Rapaj thotw se kjo paketw synon heqjen e rimbursimit të TVSH-së për fermerët dhe vendosjes së tarifës 10% për inputet bujqësore.
“Po të shikosh paketën fiskale është mjaft e papritur për ne, ajo ka impakt të drejtpërdrejt negativ me 1.75 miliardë lekë. Fakti që nuk u bë asnjë studim paraprak, një këshillim paraprak dhe nuk u mor mendimi i ekspertëve që njohin fushën, që të shikohej opinioni dhe të diheshin dëmet që sjell kjo paketë, na solli këtu ku jemi”, u shpreh kryetari i Agrobiznesit në vend, Agim Rrapaj.
Sipas tij kjo përkthehet në rritje çmimesh, ulje fitimi dhe largim masiv nga zonat rurale. Ai më tej thotë se heqja e rimbursimit të TVSH-së për bujqësinë nga 6% që është në 0%, do të rrisë edhe çmimet për qytetarët.
“Do të thotë rritje çmimesh, ulje fitimi, largim masiv nga zonat rurale, do të thotë informaliteti më i madh, dhe nëse ne hyjmë në një Ballkan të hapur hyjmë pa këmishë. TVSH është dëmtuese sa i takon formalizimit të fermerëve, është instrumenti i vetëm që formalizon fermerët dhe tregun, dhe ishte plaga më e madhe që ne kishim. 10% është e padiskutueshme por parashikimet janë për 20% dhe mbi të” – sqaron Rrapaj.
Discussion about this post