Paket Fiskale u Miratua dje në Kuvend, pa marrë parasysh asnjë kërkesë për rishikimin e saj. Por, ajo që bie në sy është se kjo paketë u miratua pa marrë parasysh propozimet e opozitës për lehtësimin e barrës së fermerëve. I vetmi ndryshim u bë në akcizën për jahtet, qeveria ndryshoi propozimi fillestar dhe vendosi në favor të tyre, duke iu lehtësuar detyrimet fiskale.
Konkretisht, nga miratimi i kësaj pakete rëndoi dhe nxori më humbës fermerët, të cilët shkuan të bisedonin me kryeministrin Rama që të mos iu rriste TVSH në 10%, por të ulej në 6%. Kryeministri i mori ata në Parlament duke thënë se do të gjenin një zgjidhje të përbashkët, por në të vërtetë vetëm sa u tall me ta, sepse në përfundim u miratua ndryshimi në ligjin për TVSH me pagesë 10% nga zero për qind që e kishin më parë. Jo vetëm kaq, qeveria i dha goditjen e fundit atyre, duke vendosur që do përjashtohen nga TVSH-ja investimet mbi 500 milionë lekë, nga 50 milionë lekë që është aktualisht.
Iu shtohen taksat qytetarëve
Qytetarët e thjeshte gjithashtu morën një goditje të fortë nga paketa e re fiskale, me ndryshimet që u bënë në ligjin për akcizën. Tashmë nga korriku i viti të ardhshëm qytetarët do të paguajnë taksë 6 lekë për çdo litër gaz që përdoret për ngrohje, gatim apo nga bizneset.
Sikur të mos mjaftohej me kaq, qeveria vendosi t’iu shtojë edhe taksimin për pagën qytetarëve. Paketa e re fiskale përcakton se, nga 1 janari 2022 qytetarët me paga deri në 40 mijë lekë nuk do të paguajnë tatim, nga 30 mijë lekë që është limiti i tanishëm. Ndërsa kur paga është deri në 50 mijë lekë, taksimi i pagës nis nga 30 mijë lekëshi. Pra qytetari do të paguajë 6.5% për pagën mbi 30 mijë lekë deri në 50 mijë lekë. Ndërsa pagat mbi 50 mijë lekë deri në 200 mijë lekë do taksohen me 13%, dhe pagat mbi 200 mijë lekë do të taksohen me 23%.
Jahtet më të privilegjuarit
Ndërsa kur vjen puna te jahtet, kategori që nuk vuan për nevoja financiare, qeveria ka ndryshuar mendje dhe ka vendosur në bazë të kërkesave të tyre. Fillimisht, qeveria propozoi taksë 65 lekë për çdo litër karburant që përdoret nga jahtet që deri më tani të gjitha mjetet e huaja lundruese e merrnin pa taksuar. Por pas diskutimeve me operatorët e turizmit, taksa u ul në 40 lekë me argumentin se dëmton turizmin. Me gjithë taksën çmimi i karburantit për jahtet do të jetë 110-120 lekë, ndërsa qytetarët po paguajnë për karburatin deri në 186 lekë, rreth 55% më shumë.
Discussion about this post