Eksperti i ekonomisë, Selami Xhepa, ka komentuar sot gjatë një interviste televizive paketën sociale të publikuar nga qeveria për të përballuar krizën ekonomike. Xhepa tha se janë vetëm dy masa konkrete që është 3 mijë lekëshi për një kategori familjesh, si dhe dhënia e 5 milionë dollarëve për kompanitë e transportit në mënyrë që mos rrisin çmimin e biletës. Por, sipas tij këto indeksime janë të pamjaftueshme përballë nivelit të çmimeve që rritet në mënyrë shumë më të shpejtë.
“Nga paketa e rezistencës sociale e vetmja masë që është marrë është një mbështetje me 3 mijë lekë të reja për një kategori të caktuar jo për të gjithë, që do të jepet për 3 muaj dhe masa e dytë mbështetja për 5 milionë dollarë për transportin publik. Nga kjo pikëpamje është e vetmja masë e drejtpërdrejtë. Pensionet janë indeksuar me 3.3%, por tani çmimet po rriten në mënyrë të frikshme, pra shtesa që marrin pensionistët është krejtësisht e papërfillshme”, tha Xhepa.
Më tutje, ai e ka cilësuar të papërshtatshme ngritjen e bordeve për kontrollin e çmimeve. Sipas tij fiksimi i çmimeve nga ana e bordit dekurajon biznesin, por edhe nuk reflekton në treg atë që ndodh në bursë.
Discussion about this post