Nga Akil Pano
Sistemi i mikrokredive, rishfaqja e fajdexhinjve që skllavërojnë familjet e pamundura.
Në vend që të ndërtonim Shqipërinë që mbështet të rinjtë dhe i vjen në ndihmë të pamundurit, krijuam shtetin që përzë qytetarët e vet jasht kufijve. Ndërsa ata që kanë mbetur këtu, sigurohemi t’i nxijmë jetën dhe ‘marrim shpirtin’ prej mekanizmave tashmë të njohur.
Përcjell ngushëllimet më të sinqerta familjes së z. Pal Trashaj 63 vjeç, viktimë e skemave të mashtrimit financiar, duhet të çojë në rishqyrtimin e ligjit për mikrokreditë dhe hetim të rastit konkret.
Pali kishte marrë kredi 760 mijë lekë të vjetra dhe detyrohej të paguante 4.8 milion lekë dhe deri sa të shlyente detyrimin i ishte bllokuar shtëpia dhe çdo gjë.
Ky rast është një kambanë alarmi për keqfunksionimin e sistemit financiar të kredive. Sa familje aktualisht në Shqipëri janë në pozita pengmarrje nga të ashtuquajturat banka dhe fondacione financiare? Sa kryefamiljarë ndodhen në gjendje të pashpresë për të shlyer detyrimin financiar të shumëfishuar prej këtyre skemave?
A nuk duhet të kishte ndërhyrë shteti deri tani? A mund të nisë një studim i shpejtë i situatës në vend dhe a mundet shteti, duke shqyrtuar rast pas rasti të konsiderojë idenë e një amnistie (falje të borxhit) për personat dhe familjet që përgjatë viteve e kanë paguar detyrimin financiar plus interesin, por për shkak se nuk është paguar në kohën e përcaktuar në marrëveshjen e kredisë, shuma në vijim është rritur e rritur?
Gjithashtu shteti duhet të ndërhyjë për të mbështetur familjet që pasi kanë marrë kredi financiare, një tragjedi ka ndodhur në familje, ose aktualisht janë në kushte papërputhshmërie nga koha kur morën kredinë dhe e kanë krejtësisht të pamundur shlyerjen e detyrimit!
Nëse shteti çdo vit shqyrton faljen e viteve të dënimit për personat që kanë kryer shkelje penale dhe ndodhen në burg, sigurisht që mund të shqyrtojë konceptin e amnistisë (faljes së borxhit financiar) kur kushtet financiare janë sikur i kam përshkruar më lart?
Zoti e ndalon rreptësisht fajden në Shkrimin e Shenjtë në mes të popullit të tij: “Në rast se ti i jep para hua dikujt nga populli yt, të varfrin që është me ty, nuk do ta trajtosh si fajdexhi; nuk do t’i imponosh asnjë kamatë“. Eksodi 22:25.
Është përgjegjësi primare e ligjvënësve, shtetit dhe gjithë shoqërisë, të ndërtojë kulturën e drejtësisë dhe dhembshurisë; drejtësisë sociale dhe solidaritetit; mëshirës, bujarisë dhe faljes.
Lexo edhe:
Viktimë e mikrokredive/ Piu fostoksinë para dyerve të SPAK-ut, ndërron jetë 63-vjeçari
U vetëhelmua para SPAK/ Flet djali i Pal Trashajt: Jemi të shokuar, babai po kërkonte drejtësi
Discussion about this post