Banorëve të Kombinatit u ka sosur durimi duke pritur rindërtimin e shtëpive pas tërmetit të nëntorit 2019 dhe ditën e sotme janë ngritur në protestë kundër Bashkisë së Tiranës. Sipas tyre, pallati do vetëm riparim dhe nuk ka pse shembet, madje një pjesë e mirë e tyre janë kthyer në ato banesa. Por nga ana tjetër Bashkia e Tiranës është e vendosur ta shembë dhe nuk u jep asnjë informacion se ku do t’i marrin shtëpitë pas kësaj. Për më tepër, bonusi i qirave që jep kjo bashki është shumë më i vogël se vlera reale e qirave që ata paguajnë.
“Shqetësimi im kryesor është që këta kërkojnë të shembin pallatin, kur ai është i padëmtuar. Ka nevojë për ndonjë riparim të lehtë. Kemi marrë ekspertë dhe e kemi fituar gjyqin. Shtëpia ime nuk ka asnjë lloj dëmtimi, jemi kthyer në shtëpi. Merrnim një bonus qiraje që nuk mjaftonte. Më jepnin 180 mijë lekë qira, kurse unë paguaja 260 mijë lekë qira, nuk mjaftonte. Shumë banorëve si unë nuk u mjafton. Në kërkojmë edhe nëse do të na prishet pallati, le të na strehojnë këtu. Zero informacion se ku do të ndërtohet pallati. Kërkojmë ndonjë informacion në bashkinë e Kombinatit dhe asnjë informacion”- tha një banor.
Një banore tjetër shprehet se Bashkia e Tiranës nuk e ndërton pallatin në të njëjtin truall ku ndodhet ai që do të shembet. Ata shprehen se shumë njerëz janë në rrugë të madhe dhe se nuk kanë asnjë informacion se çfarë do të bëhet me ta.
“I prishën shtëpitë. Atëherë ndërtoje siç e prishe, se njerëzit janë në rrugë të madhe. Ca janë të moshuar. Apo presin kur të kthejnë këmbët nga dielli dhe ata?! Sikur të na kishin thënë se kur do të fillojnë punimet, dhe ne e kthenim mendjen. Nga këto jemi mërzitur. Po rregulloji pra punët e popullit, ku do të shkojë ai?! Jemi në katrahurë. Unë marr 220 mijë lekë qira, banesa kushton 200. Njëzetmijë lekë ngelen…Nuk kemi asnjë informacion, asnjë shpresë se si do të vejë halli. Ne ua dhamë votën që të merrnim shtëpinë, se ata e dinin… Po për ne të Kombinatit nuk është zënë kurrë me gojë, vetëm për Laç…Kurse neve nuk na zënë me gojë!”- evidentoi një tjetër qytetare.
Discussion about this post