Banorët e pallatit nr.7 në zonën e plazhit, në qytetin e Durrësit janë ngritur në protestë ditën e sotme, përpara prokurorisë. Ata kërkojnë ndërprerjen e punimeve që po bëhen për ndërtimin e një ndërtese pranë tyre.
Ky pallat me 43 hyrje ka mbetur i dëmtuar prej tërmetit të 26 nëntorit. Punimet që po bëhen për ndërtimin e pallatit të ri, po e dëmtojnë ndërtesën ku banorët jetojnë, prandaj ata ndihen të rrezikuar. Shkalla e dëmtimit që ka marrë pallati i tyre gjatë tërmetit, e ka klasifikuar në D3, por ende nuk është riparuar. Banorët janë ngritur disa herë në protestë, përpara prokurorisë e më pas janë drejtuar tek Drejtoria Vendore e Policisë Durrës. Në të dyja këto institucione, nuk kanë marrë zgjidhje, pasi i kanë përcjellë duke u thënë se nuk kanë kompetenca mbi çështjen në fjalë.
Banorët kanë treguar se si nuk po gjejnë zgjidhje askund, e po tentojnë vetë t’i ndalojnë punimet e firmës. Kërkesat e tyre për ndalimin e punimeve, riparimin e pallatit, e cila është një e drejtë e tyre.
Nëse nuk do të ketë reagim nga shteti, banorët pohojnë se do të kalojnë në vetëgjyqësi.
