Kreu i Këshillit Kombëtar të PD, Edi Paloka ka reaguar për mbledhjen e përbashkët të dy qeverive, Shqipëri-Kosovë që do të mbahet në Prishtinë dhe vizitën e kryeministrit Edi Rama.
Në një postim në Facebook, Paloka thotë se Rama “flirton” me presidentin serb Alexandër Vuçiç dhe nga ana tjetër sulmon liderët e Kosovës. Gjithashtu ai kritikon qeverinë pse hodhi poshtë rezolutën për gjenocidin serb në Kosovë dhe shton se Rama në samitin e NATO nuk mbrojti Kosovën por justifikoi Serinë.
“Ky është Edvin Rama që puthet e flirton me Vuçiçin ndërkohë që sulmon pothuajse të gjithë liderët kosovarë e merr përsipër rrëzimin e qeverive në Kosovë. Rama, që nuk lejoi maxhorancën nën urdhrat e tij në parlament, të miratonte rezolutën e përgatitur nga opozita, ku dënohej genocidi serb në Kosovë. Pak ditë më parë, e frymëzuar nga Rama, kryeministria e Serbisë Brnabiç, e mohoi ekzistencën e genocidit në Kosovë. Rama, që në Samitin e fundit të NATO-s, ishte i vetmi që në vend që të mbronte anëtarësimin e Kosovës, u impenjua të justifikonte kundërshtitë e Serbisë. Rama, që edhe pak ditë më parë, në Ukrainë, harxhoi më shumë kohë për të justifikuar Serbinë dhe Vuçiç, se sa të fliste për Shqipërinë. Atë ditë, ambasada ruse shpallte se ishin vrarë dhjetëra shqiptarë që luftonin krah Ukrainës, ndërsa të tjera burime tregonin se sa mercenarë serb luftojnë në të njëjtën kohë për Putinin. Rama, që ka marrë përsipër të çojë përpara si kryeministër i Shqipërisë, projektin ruso-serb të Ballkanit të Hapur”, shkruan Paloka.
Discussion about this post