Kryetari i Këshillit Kombëtar në Partinë Demokratike, Edi Paloka, komentoi deklaratat e kryeministrit Rama lidhur me mandatin e katërt dhe perspektivën e Shqipërisë për t’u anëtarësuar në Bashkimin Evropian.
Sipas Palokës, Rama është i sinqertë në pjesën që thotë se fitorja për Rilindjen është e domosdoshme, por për arsye krejt të ndryshme nga ato që ai pohon. Paloka e lidh këtë nevojë për fitore me frikën e një humbjeje të mundshme që do ta çonte Ramën para drejtësisë për pasojat e qeverisjes së tij.
Ai ka theksuar se në vitin e fundit janë larguar më shumë se 100 mijë shqiptarë nga vendi, dhe ka përmendur ardhjen e 40 ‘kriminelëve’ nga Afrika që do të transferohen në Shqipëri. Paloka ka kritikuar gjithashtu kërkesën e Ramës për një mandat të katërt, duke thënë se këtë e kanë hedhur poshtë të gjitha palët që kanë autoritet mbi procesin e integrimit të Shqipërisë në BE, pasi negociatat janë ndërprerë dhe Rama ka dështuar të plotësojë kushtet për anëtarësim.
“Sigurisht edhe Rama është i sinqertë deri në pjesën që thotë, ‘që edhe për Rilindjen fitorja është e detyrueshme, e domosdoshme’, por jo për arsyen që thotë ai. Për arsye krejt të tjera. Sepse Rama e di që në rast të një humbje të tij, do të jetë shumë shpejt para drejtësisë dhe do të duhet t’i përgjigjet drejtësisë dhe shqiptarëve për të gjitha ato të zeza dhe fatkeqësi që i ka shkaktuar shqiptarëve në këto 12 vite.
Më e fundit fare është që vetëm në vitin e fundit janë larguar mbi 100 mijë shqiptarë dhe lajmi i ditës sot ishte që, nesër do të vijnë në Shqipëri një numër prej 40 kriminelësh, do ta them copë, nga Afrika. Kanë ardhur në Itali, të cilët ndodhen të burgosur aty dhe do të vijnë t’i depozitojnë në burgun që Rama ka ngritur në mes të Europës dhe quhet Shqipëri. I thashë këto dy raste sepse do të mjaftonin për një vend tjetër këto dy detaje për të kuptuar se ku ka shkuar një vend.
Ndërkohë që Rama, ka pafytyrësinë të thotë që duhet patjetër një mandat i katërt. Pas 12 vitesh, kërkon një mandat të katërt, që Shqipëria të shkojë në Bashkimin Evropian.
Së pari, këtë fluckën e fundit ja kanë hedhur poshtë të gjithë ata që praktikisht e kanë në dorë anëtarësimin ose jo të Shqipërisë, pra ata që japin OK, nëse Shqipëria hyn ose në BE. Fillimisht i ndërprenë negociatat me të cilat Rama ato ditë po mburrej se ka ecur më shpejt sesa duhej me negociatat. E pikërisht atë ditë që Rama bënte këtë deklaratë BE, i ndërpreu vazhdimin e negociatave. Pra, hapjen e kapitujve dhe vazhdimin e diskutimit të hapjes së kapitujve të rinj të negociatave. Më e fundit ishte dje, në takimin që Rama mendonte se do ta shfrytëzonte për fushatë por që i doli e kundërta. Dhe dje iu tha copë se jo vetëm nuk ka lidhje qëndrimi në pushtet i PS me integrimin e Shqipërisë, por është krejt tjetër, janë të tjera arsyet se pse Shqipëria mund të integrohet dhe kushtet që duhet të plotësojë Shqipëria për t’u integruar. Kushte që Rama në 12 vite nuk i plotëson”, u shpreh ai.
Discussion about this post