Një ngjarje e rëndë tronditi Greqinë para disa ditësh, ku një 17-vjeçar shqiptar, me banim në ishullin Kefalonia, ka humbur jetën. Bashkë me 3 shokë, të rinjtë vendosën të bëjnë një shëtitje me makinë, pas shkollës. Fatkeqësisht, shoferi humbi kontrollin e automjetit në rrugën Lasi të zonës Argostoli, makina u kthye përmbys dhe mori flakë menjëherë.
Tre të rinjtë dolën menjëherë, pa lëndime ndërsa 17-vjeçari Fabio nuk arriti të hiqte rripin e sigurimit në sediljen e pasme ku e përpinë flakët.
Kanë qenë miqtë, familjarët dhe të afërmit e 17-vjeçarit që u dogj për së gjalli në makinë të cilët kanë vendosur trëndafila të bardhë, qirinj, sende personale të viktimës dhe mesazhe ngushëlluese në vendin ku adoleshenti shqiptar dha frymën e fundit.
Fabio do të përcillet për në banesën e fundit, nesër e enjte në orën 15:00 në Kishën e Shenjtë Metropolitane të Argostolit.
Ndërkohë ditën e djeshme drejtuesi i makinës, një 18-vjeçar grek, i cili sapo e kishtë marrë patentën, doli para gjykatës për të marrë masën e sigurisë. 18-vjeçari, i cili u arrestua nga policia pas ngjarjes tragjike, përballet me akuzën e vrasjes nga pakujdesia.
Discussion about this post