Xhemal Loka, bashkëshorti i 41-vjeçares Bedrie Loka, e cila i dha fund jetës me fostoksinë mëngjesin e 2 Janari në banesën e saj në fshatin Vadardhë të Sukthit, ka dalë para togave të zeza.
Në pamjet e publikuara ai shihet pas kafazit prej xhami të Gjykatës, ku do të njihet me masën e sigurisë.
Ai u arrestua më 6 Janar, 4 ditë pas aktit të vetëflijimit të bashkëshortes së tij, nën akuzën se e ka kërcënuar me thikë dhe e ka shtyrë drejt vetëvrasjes.
41-vjeçarja dyshohet se piu fostoksinë për shkak të gjendjes së rënduar psikologjike pas kërcënime të vazhdueshme me vdekje nga ana e bashkëshortit të saj dhe hapjes së një adrese TikTok-u ku publikoheshin foto me përshkrime denigruese për të.
Sipas uniformave blu, pas kthimit nga Greqia ai e ka kërcënuar me thikë bashkëshorten në sy të një prej fëmijëve të tyre se do ta vriste.
Dhe një ditë pas vdekjes së 41-vjeçares, më 3 Janar, Xhemal Loka ka përditësuar foton e tij të profilit në rrjetin social Facebook ku ka vendosur një fjongo të zezë në shenjë zie për humbjen e nënës së katër fëmijëve të tij.
Ndërkohë në telefonin e tij, të cilin ia kishte dhënë të motrës për ta fshehur, janë gjetur video e SMS kërcënuese ndaj të shoqes.
Celulari i 45-vjeçarit është sekuestruar nga policia së bashku me atë të viktimës. Kanë qenë dëshmitë e fëmijëve të çiftit që kanë “fundosur” të atin, pasi kanë treguar për hetuesit dhunën psikologjike dhe fizike që Xhemal Loka ka ushtruar drejt të shoqes.
Ndërkohë, ekspertët e IT po zbulojnë se kush e hapi adresën e TikTok në emër të 41-vjeçares ku u publikuan foto denigruese të saj.
Discussion about this post