Zbulimi i një parcele me 125 rrënjë kanabis në repartin ushtarak të Zall Herrit ka çuar në arrestimin e 3 ushtarakëve dhe pezullimin nga detyra të disa të tjerëve.
E ndërsa Prokuroria po heton lidhur me rastin, gjithashtu hetime nga nisur edhe policia ushtarake, përsa kohë kemi një rast të paprecedentë, kur në një repart ushtarak, kultivohet kanabis.
Sipas Top Channel, që ka publikuar edhe pamjet nga parcela me kanabis, po verifikohen thëniet e tre ushtrarakëve të arrestuar Gramoz Mullai, Rustem Koci dhe Gentian Zhurda me detyrë në seksionin e sigurisë, të cilët insistuan në gjykatë se nuk e kanë shpërdoruar detyrën dhe se e kishin kontrolluar territorin prej 140 hektarë, por që shqetësimet e tyre për mungesën e logjistikës i kishin përcjellë me email.
Sakaq, nën procedim në gjendje të lirë janë edhe komandanti i repartit, Petrit Dalanaj, zëvendës komandanti dhe dy të tjerë, të cilët po ashtu insistojnë se nuk e kanë shpërdoruar detyrën.
I kontaktuar nga Top Channel, Dalanaj nuk pranoi të japë një version për këtë ngjarje të padëgjuar, sa kohë në brendësi të një reparti ushtarak u zbulua drogë.
Deri më tani janë pyetur 11 ushtarakë që shprehen se plani i kontrollit të territorit ishte zbatuar në datat 10 dhe 11 korrik. Por askush nuk di të shpjegojë ende se si u shkel perimetri i një zonë ushtarake, të një vendi anëtar në NATO dhe për më tepër cilët janë kultivuesit që hynë në këtë bazë.
Discussion about this post