Vijojnë përplasjet dhe replikat në distancë mes deputetëve demokratë të rreshtuar në grupime të ndryshme.
Duket se tani përplasja më e madhe është mes deputetëve që qëndrojnë në krah të Lulzim Bashës dhe kolegëve të tyre që po kundërshtojnë këtë të fundit, ndërsa janë rreshtuar në krah të Gazment Bardhit.
Në një intervistë në Euronews Albania, deputetja Oriola Pampuri, e cila mbështet Lulzim Bashën, kërkoi nga kreu i grupit parlamentar që japë sqarime përse ndryshoi qëndrim ndaj Berishës së shpallur non grata.
“Këta që janë sot si luftëtarët e mëdhenj të bashkimit, kanë qenë luftëtarët më të mëdhenj kundër non gratës.
Dhe të themi të drejtën, lëvizje me një shpejtësi marramendëse qëndrimesh në politikë të japin të kuptosh një lloj paqëndrueshmërie. Ata që sot kërkojnë bashkimin e grupit parlamentar duhet më parë të shpjegojnë përse ngulën këmbë të ishin deri këtu”, tha Pampuri.
Pampuri sqaroi pse ka zgjedhur të mos mbështesë Berishën.
“Unë nuk mund të eci përpara kundër SHBA, BE e Britanisë së Madhe, kjo është absurde. Mua nuk më ka detyruar as zoti Basha të jem aty, ka qenë qëndrimi im personal dhe i palëkundur nga fillimi deri sot dhe askush tjetër nuk më shantazhon dhe nuk më detyron të mbajë qëndrime në këtë krah apo në kahun tjetër”, u shpreh deputetja e PD.
Discussion about this post