Kolapsi që solli pandemia ka bërë që qytetarët në vitin që lamë pas të shpenzojnë më shumë për shëndetin dhe të kursejnë për konsume të tjera.
Sipas anketës mbi buxhetin e familjeve, publikuar sot nga INSTAT-i, 28% e shpenzimeve nga familjet shqiptare shkuan kryesisht për produkte si; alkool, vitamina, maska dhe medikamentet të tjera me të cilat mund të mjekohej koronavirusi.
“Familjet përgjatë vitit 2020 rritën me 28 % shpenzimet mesatare për konsum mujor për shëndet, si rezultat i rritjes më të madhe të shpenzimeve për nëngrupin “vitamina”. Shpenzimet mesatare mujore të një familjeje për shëndet në 2020-ën llogariten në vlerë 4.487 lekë, nga 3.506 lekë që ishin në 2019-ën”, thuhet në dokument.
Ndër të tjera bëhet me dije se, shpenzimet mesatare mujore për konsum për një familje të përbërë mesatarisht nga 4 persona, llogariten 83.475 lekë në vitin 2020. Një shifër kjo shumë më e ulët se niveli i parakrizës.
