Gjatë vitit pandemik 2020 në Shqipëri kanë qarkulluar 156 milionë prerje të kartëmonedhave fizike me një vlerë 350 miliardë Lekë, duke shënuar një rritje me 16 milionë copë më shumë krahasuar me 2019-n. Sipas të dhënave zyrtare të bankës qendrore, kjo rritje është mbi mesataren vjetore të përdorimit të parasë cash, ndërsa për ekspertët e ekonomisë dukuria shpjegohet nga disa faktorë.
“Pandemia rriti tendencën e qytetarëve për të patur para në shtëpi, por dhe për të shpenzuar kursimet që mbanin brenda. Po ashtu një tjetër stimulim i përdorimit të parasë fizike është edhe mënyra se si u përdor teknologjia vetëm për të kryer porosi dhe jo për të paguar online, çka rriti tërheqjen e parasë në bankomatë.”
Një tjetër faktor për profesor Adrian Civicin është edhe pjesa e ekonomisë informale e cila gjatë krizave ekonomike ka tendencën të rritet, dhe në këtë mënyrë stimulon përdorimin e parasë cash.
“Kemi të bëjmë me ndryshime në tregun e punës, ku një pjesë mund të paguhen në të zezë, bizneset përdorin paranë cash për blerje me njëri-tjetrin, apo edhe dhënia e ndihmave në formën e pagave të luftës bëri që të tërhiqen dhe shpenzohen paratë.”
Sipas të dhënave të Bankës së Shqipërisë në vitin 2020 shqiptarët kanë përdorur më shumë prerje të mëdha të parasë: kartëmonedhat 2 mijë dhe 5 mijë Lekë zunë 54% të prerjeve të hedhura në qarkullim
“Përdorimi i kartëmonedhave të mëdha lidhet me çmimet e produkteve: nëse ka rritje atëherë përdoren prerjet e mëdha.” Banka e Shqipërisë pritet hedhë brenda muajit Qershor të këtij viti prerjen e re 10 mijë Lekë të kartëmonedhës, e cila është prerja më e madhe e emetuar ndonjëherë në Shqipëri. Sipas raportimeve zyrtare pandemia rriti edhe tendencën për falsifikimin e parasë, kryesisht për prerjet 2 mijë dhe 1 mijë Lekë.
Discussion about this post