Skandali i “Pandora Papers” i zbuluar së fundmi nga një rrjet gazetarësh ka sjellë trazira në liderët botërorë, që tani nuk u ngelet gjë tjetër veçse të justifikohen para “vartësve” të tyre.
Qindra politikanë shkelën ligjin e fshehën pasuritë e tyre të korruptuara.
Në tryezën e investigimit aktualisht janë të dhënat e 27 mijë kompanive, nga ku rezulton se 13 prej tyre janë në Shqipëri.
Njerëzit e fuqishëm dhe me pushtet, por edhe personazhe publike të fushave të tjera, emra të njohur në të gjithë botën fshehin asete në kompani dhe truste të fshehta, ndërkohë që qeveritë e tyre bëjnë pak për të ndaluar qarkullimin global të parave ilegale.
Ky skandal ka sjellë reagime të shumta të cilat do të zbardhen në vijim, ndërsa theksojmë se i pari mes tyre është kryeministri çek, Andrej Babiš. Shefi i qeverisë çeke është nën presion për të shpjeguar një strukturë të ndërlikuar që ai përdori për të financuar blerjen e një rezidencë prej 13 milionë funtash në jug të Francës.
Por pas publikimit, Babiš shkroi në Twitter: “Unë kurrë nuk kam bërë asgjë të paligjshme ose të gabuar, por kjo nuk i pengon ata të përpiqen të më denigrojnë përsëri dhe të ndikojnë në zgjedhjet parlamentare çek”.
Theksojmë se në listën e politikanëve që janë zbuluar deri më taninë këtë skandal botëror janë Vladimir Putin, Tony Blair, etj.
Pjesë e “Pandora Papers” edhe kryeministri i Malit të Zi dhe ministri serb i Financave
Qendra hulumtuese malazeze Mans, e cila ka marrë pjesë në hulumtimet për Letrat e Pandorës, ka thënë se presidenti i Malit të Zi, Millo Gjukanoviç, dhe djali i tij, Bllazho, kanë nënshkruar marrëveshje të fshehta për menaxhimin e pasurisë në vitin 2012, duke u fshehur pas një rrjeti kompanish nga Mbretëria e Bashkuar, Zvicra, Ishujt e Virgjër Britanikë, Panamaja dhe Gjibraltari.
Kabineti i Gjukanoviçit ka thënë se publikimi i qendrës Mans është një tjetër “përpjekje për të diskredituar presidentin e Malit të Zi dhe familjen e tij”. Në reagim thuhet se Gjukanoviç ka dhënë sqarime për aktivitetet e vitit 2012 dhe se pretendimet e organizatës Mans janë të pavërteta, shkruan rel.
Në Serbi, organizata Krik, e cila po ashtu ka marrë pjesë në hetimet për Letrat e Pandorës, ka zbuluar se ministri i Financave i Serbisë, Sinisha Malli, është pronar i 24 apartamenteve luksoze në bregdetin bullgar.
Si pronar i dy kompanive nga Ishujt e Virgjër Britanikë, Malli ka blerë 23 apartamente, ndërsa një tjetër e ka blerë në emrin e tij, thuhet në dokumente. Malli nuk i është përgjigjur thirrjes nga Krik për intervistë, ndërsa më herët ka mohuar se ka 24 apartamente në Bullgari, shkruan më tej rel.
