Klubi kroat HNK Gorica, që militon në Prva Liga (kategoria elitë e Kroacisë), përmes rrjeteve sociale, ka njoftuar për zhdukjen e futbollistit 27-vjeçar, Hamid Abdullah Talal, i cili dy javë më parë u transferua nga hungarezët e ZTE drejt klubit kroat.
Të shtunën, më 19 gusht, Talal u largua nga Kroacia për në Budapest për të sjellë dokumentacionin e nevojshëm për regjistrim në klubin e tij të ri, ndërkohë që prej ditës së djeshme, nuk është bërë më i gjallë.
Futbollisti kishte një Porsche të bardhë “Taycan” me targa suedeze, teksa ka pasaportë irakiane dhe suedeze. Ai së fundmi nënshkroi kontratë deri në verën e ardhme me Goricën.
Autoritetet nuk përjashtojnë mundësinë që Hamid të jetë viktimë e një rrëmbimi, duke qenë se ai vjen nga një familje e pasur.
“Zhdukja është raportuar në policinë hungareze, dhe familja dhe HNK Gorica po kërkojnë nga kushdo që ka ndonjë informacion për Hamid të kontaktojë stacionin apo klubin më të afërt të policisë”, shkruan klubi i HNK Goricës në “Facebook”.
Discussion about this post