Eksperti i ekonomisë dhe aktivisti Pano Soko ka mbajtur një fjalim të fortë gjatë protestës së 81-të kundër qeverisë.
Soko ka kritikuar modelin ekonomik të qeverisë, duke u ndalur veçanërisht te koncesionet dhe Partneritetet Publike-Private (PPP).
Sipas tij, kontratat afatgjata, që shkojnë deri në 35 vite, po i ngarkojnë brezat e ardhshëm me faturën e marrëveshjeve të sotme.
“Çfarë faji kanë qytetarët e së ardhmes që të paguajnë për marrëveshjet që lidhen sot?”, është shprehur ai.
Soko ka ngritur akuza edhe për mënyrën se si qeveritë menaxhojnë fondet publike gjatë mandateve.
Në fjalën e tij, ai u ndal edhe te sistemi shëndetësor dhe premtimi për shëndetësi falas.
Sipas Sokos, nga taksat e qytetarëve mblidhen rreth 700 milionë euro në vit për Ministrinë e Shëndetësisë.
Ndërkohë, ai pretendon se shqiptarët shpenzojnë edhe rreth 1.5 miliardë euro të tjera nga xhepi për shërbimet shëndetësore.
“Shqiptarët paguajnë taksat dhe dy herë më shumë para jashtë tyre për kujdesin shëndetësor”, deklaroi eksperti.
Sipas tij, këto shifra tregojnë se premtimi për shëndetësi falas ka dështuar.
Soko tha se problemi nuk qëndron vetëm te Edi Rama si individ, por te modeli i qeverisjes që ai e cilësoi si “ramizëm”.
Ai kritikoi gjithashtu qeverisjen socialiste prej më shumë se tre mandatesh.
Duke iu referuar mënyrës së drejtimit të vendit, Soko përdori edhe shprehjen “KÇK”, të cilën e interpretoi si “kap çfarë të kapësh”.
Fjalimi i tij u mbajt në kuadër të protestës së 81-të, ku qytetarët vijojnë kërkesat për ndryshim politik dhe dorëheqjen e qeverisë.
Discussion about this post