Papa bën thirrje për armëpushim në ditën e Pashkës: Armët po zënë vendin e fjalëve

Në ditën e Pashkëve Ortodokse Papa Françesku ka apeluar edhe një herë për një armëpushim në Ukrainë, dy muaj që prej fillimit të agresionit rus.

“Në vend që të ndalet, lufta është përkeqësuar. Është e trishtueshme që në këto ditë më të shenjta dhe solemne për të krishterët, të dëgjojmë zhurmën vrastare të armëve, ndërsa duhet të dëgjonim atë të kambanave që lajmërojnë ringjalljen… Përsëris thirrjen për një armëpushim të Pashkëve, shenjën më të vogël të prekshme të gatishmërisë për paqe. Ndaloni sulmet për të lehtësuar vuajtjet e njerëzve të rraskapitur. Është e trishtueshme që armët gjithnjë e më shumë po zënë vendin e fjalës,” tha më tej Papa.

Flamuri blu dhe i verdhë i Ukrainës u valëvit mes besimtarëve të mbledhur në sheshin e Shën Pjetrit, ku udhëheqësi i Kishës Katolike Romake kujtoi sulmet ruse. Me sulmet e nisura prej 24 shkurtit nga Rusia, populli Ukrainas i bën ballë luftës prej 60 ditësh.