Të shtunën në mbrëmje, buletini mbi shëndetin e Papës tregoi një pamje ende kritike, por që zbuloi edhe se Papa është në gjendje të lëvizë e të ecë.
“Nata ishte e qetë,”kështu thuhet në buletinin e Vatikanit për gjendjen shëndetësore të Papa Françeskut, i cili ndodhet i shtruar në Poliklinikën Gemelli në Romë që prej 14 shkurtit për pneumoni të dyfishtë.
Vatikani tha se Papa po merrte oksigjen, por nuk kishte temperaturë, po hante dhe ishte i vetëdijshëm dhe po lutej.
Parametrat e tij hemodinamikë – që lidhen me qarkullimin e gjakut – po ashtu janë stabile dhe Papa nuk ka numër të lartë të qelizave të bardha në gjak, që shpesh tregojnë për një infeksion, tha Vatikani, duke shtuar se prognoza, sikurse në ditët paraprake, mbetet e “rezervuar”.
Pavarësisht mungesës së krizave të forta të frymëmarrjes, shqetësimi mbetet pas bronkospazmës që goditi Atin e Shenjtë pak ditë më parë. Kjo e sotmja është e diela e tretë që Bergoglio nuk e mbajti Meshën e Shenjtë në sheshin e Shën Pjetrit, por dërgoi një tekst të shkruar, ku falënderonte besimtarët për dashurinë dhe afërsinë e treguar gjatë kësaj periudhe.
Discussion about this post