Papa Françesku: Lufta është shkatërrim! Ndaloni vëllezër

Papa Françesku, duke iu drejtuar besimtarëve sot në sheshin e Shën Pjetrit, iu referua zhvillimeve në Lindjen e Mesme. 

Papa ndër të tjera theksoi:

“Unë ndjek atë që po ndodh në Izrael dhe Palestinë. Shpreh dhimbjen dhe shqetësimin tim të veçantë, lutem dhe qëndroj pranë pengjeve, viktimave dhe familjeve të tyre. Po mendoj për situatën e rëndë humanitare në Gaza. Më dhemb që ditët e kaluara u prekën spitali anglikan dhe famullia ortodokse greke. E përsëris apelin tim për lirimin e pengjeve. Lufta është gjithmonë një disfatë, e kam fjalën edhe për Ukrainën. Lufta është shkatërrim i vëllazërisë njerëzore, ndaloni, vëllezër”.

Papa Françesku shtoi se e premtja e ardhshme, 27 tetori, për Kishën Katolike do të jetë një ditë agjërimi, pendimi dhe lutjeje, në favor të paqes.

Në orën 18:00 në Shën Pjetrin do të bëhet lutja, e cila do të jetë edhe një thirrje për paqe në mbarë botën.