Kisha Katolike është sot në zi për humbjen e Atit të Shenjtë, Papa Françeskut. Lajmi u bë i ditur nga Kardinali Kevin Farrell, i cili në një deklaratë zyrtare konfirmoi se Papa Françesku ka ndërruar jetë në orën 07:35 të mëngjesit, në moshën 88-vjecare. Ai u shpreh me dhimbje për këtë humbje të madhe, duke theksuar përkushtimin e tij të plotë ndaj Zotit, Kishës dhe të varfërve.
“Të dashur vëllezër dhe motra, me dhimbje të thellë duhet të njoftoj vdekjen e Atit tonë të Shenjtë, Papa Françeskut. Në orën 07:35 të mëngjesit të sotëm, Peshkopi i Romës, Françesku, u kthye në shtëpinë e Atit. E gjithë jeta e tij ishte një përkushtim i plotë ndaj shërbimit të Zotit dhe Kishës së Tij. Ai na mësoi të jetojmë vlerat e Ungjillit me besnikëri, guxim dhe dashuri universale, veçanërisht në shërbim të më të varfërve dhe të përjashtuarve. Me mirënjohje të thellë për shembullin e tij si një dishepull i vërtetë i Jezus Krishtit, ia rekomandojmë shpirtin dashurisë dhe mëshirës së pafund të Zotit të Shenjtë.”
Në muajt e fundit, Papa Françesku është përballur me sfida serioze shëndetësore. Në shkurt 2025, ai u shtrua në spitalin Gemelli në Romë për shkak të një bronkiti, i cili më vonë u komplikua në një pneumoni të dyanshme. Gjatë qëndrimit në spital, ai përjetoi dy episode të pamjaftueshmërisë akute respiratore, duke kërkuar ventilim mekanik dhe terapi intensive. Gjithashtu, u raportua se ai kishte shenja të hershme të dështimit të veshkave, megjithëse gjendja e tij u konsiderua e qëndrueshme nga mjekët. Pavarësisht përmirësimeve të pjesshme, gjendja e tij mbeti e brishtë. Më 20 prill 2025, gjatë Pashkëve, ai bëri një paraqitje të shkurtër në Sheshin e Shën Pjetrit, duke përshëndetur besimtarët nga popemobile, por nuk e udhëhoqi meshën për shkak të rekomandimeve mjekësore për të kufizuar aktivitetet e tij. Këto sfida shëndetësore të fundit e kishin dobësuar ndjeshëm Atin e Shenjtë, duke e bërë më të vështirë për të përmbushur detyrat e tij papale.
Papa Françesku, me emrin e lindjes Jorge Mario Bergoglio, u zgjodh Papë më 13 mars 2013, duke u bërë Peshkopi i Romës dhe udhëheqësi i 1.3 miliardë katolikëve në mbarë botën. Ai ishte Papa i parë nga Amerika Latine dhe njëkohësisht jezuiti i parë që mori detyrën më të lartë në Vatikan.
I njohur për stilin e tij të thjeshtë, përkushtimin ndaj drejtësisë sociale dhe përpjekjet për një Kishë më të hapur dhe më afër njerëzve, Papa Françesku përfaqësoi një kthesë të rëndësishme në drejtimin e Vatikanit. Ai shpesh theksonte rëndësinë e mëshirës, solidaritetit me të varfërit dhe nevojën për dialog ndërfetar.
Ndër momentet që lanë gjurmë të veçanta në kujtesën e shqiptarëve ishte vizita historike e Papës në Shqipëri më 21 shtator 2014. Kjo vizitë shënoi herën e parë që një Papë vizitonte vendin tonë që nga viti 1993, dhe përkon me një periudhë kur Shqipëria po afirmohej gjithnjë e më shumë në arenën ndërkombëtare si një model i bashkëjetesës fetare. Gjatë qëndrimit të tij në Tiranë, Papa Françesku vlerësoi guximin dhe besimin e shqiptarëve gjatë periudhës së diktaturës dhe shprehu mirënjohjen për tolerancën ndërfetare që karakterizon shoqërinë shqiptare.
Papa Françesku do të kujtohet si një nga figurat më të dashura dhe më progresive të papatit modern – një njeri i thjeshtë, i përulur dhe i vendosur për të afruar Kishën me njerëzit, sidomos me ata në nevojë.
Ceremonia mortore pritet të zhvillohen në Vatikan në ditët në vijim, me pjesëmarrjen e liderëve fetarë dhe shtetërorë nga e gjithë bota.
Lexo edhe:
Kush ishte Papa Françesku (Profili)
Discussion about this post