Papa Leone XIV ka mirëpritur dakordësinë mes Shteteve të Bashkuara dhe Iranit për të arritur një armëpushim dy javor.
“E mirëpres njoftimin e një armëpushimi të menjëhershëm dyjavor”, tha Papa, ndërsa shtoi se vetëm me negociata mund të arrihet fundi i luftës.
“Pas këtyre orëve të fundit të tensionit të madh në Lindjen e Mesme dhe në të gjithë botën, e mirëpres me kënaqësi dhe si shenjë shprese të zjarrtë njoftimin e një armëpushimi të menjëhershëm dyjavor”, tha Papa Leo XIV në përfundim të audiencës së tij të përgjithshme në Sheshin e Shën Pjetrit.
“Vetëm nëpërmjet një kthimi në negociata, mund të përfundojë lufta. Ju bëj thirrje ta shoqëroni këtë kohë pune delikate diplomatike me lutje, duke shpresuar që gatishmëria për t’u angazhuar në dialog të bëhet instrumenti për zgjidhjen e konflikteve të tjera në të gjithë botën. Ua rinovoj të gjithëve ftesën për t’u bashkuar me mua në vigjiljen e lutjes për paqen që do të kremtojmë këtu në Bazilikën e Shën Pjetrit të shtunën, më 11 prill.”, shtoi ai.
Kujtojmë që presidenti i SHBA, Donald Trump njoftoi armëpushimin pasi kërcënoi Iranin duke thënë se do të shfarosë “një qytetërim brenda natës” më pak se dy orë para ultimatumit të vënë prej tij.
“Bazuar në bisedat me kryeministrin Shehbaz Sharif dhe marshallin e ushtrisë Asim Munir të Pakistanit, gjatë të cilave ata kërkuan ndalimin e forcës shkatërruese që do të dërgohej në Iran sonte, dhe në varësi të marrëveshjes së Republikës Islamike të Iranit për rihapjen e plotë, të menjëhershme dhe të sigurt të Ngushticës së Hormuzit, unë pajtohem të pezulloj bombardimet dhe sulmet kundër Iranit për një periudhë dy-javore. Ky do të jetë një armëpushim i ndërsjellë!”, shkroi Presidenti Trump në Social Truth.
Sipas burimeve të New York Times, “po”-ja e Iranit ndaj propozimit u miratua drejtpërdrejt nga Udhëheqësi i ri Suprem, Mojtaba Khamenei.
Sipas gazetës, ndërhyrja e Kinës ishte gjithashtu vendimtare. Bisedimet janë planifikuar të fillojnë të premten, më 10 prill, në Islamabad të Pakistanit.
Discussion about this post