Vetëm 24 orë pas arritjes së një armëpushimi mes Izraelit dhe Hezbollahut, sirenat janë dëgjuar përsëri në Libanin jugor. Tanket izraelite sulmuan gjashtë zona në Libanin jugor të enjten. Ushtria izraelite tha se armëpushimi i saj me Hezbollahun u shkel pasi të dyshuarit, disa me automjete, arritën në disa zona në zonën jugore të Libanit. Tanket izraelite sulmuan gjashtë zona brenda atij brezi kufitar, thekson Reuters. Ushtria izraelite u kishte kërkuar banorëve të qyteteve përgjatë brezit kufitar që të mos kthehen ende për sigurinë e tyre.
Të gjitha zonat e goditura nga ushtria izraelite shtrihen brenda dy kilometrave nga Linja Blu që demarkon kufirin midis Libanit dhe Izraelit. Një nga burimet e sigurisë tha për Retuers se dy persona u plagosën në Markaba.
Familjet libaneze të zhvendosura nga shtëpitë e tyre pranë kufirit jugor janë përpjekur të kthehen për të kontrolluar pronat e tyre. Por trupat izraelite mbeten të stacionuara brenda territorit libanez në qytete përgjatë kufirit. Nuk kishte asnjë koment të menjëhershëm mbi raketat e tankeve nga Hezbollahu apo Izraeli, të cilët kanë luftuar për më shumë se një vit paralelisht me luftën në Gaza.
Armëpushimi midis Izraelit dhe grupit të armatosur libanez Hezbollah hyri në fuqi të mërkurën sipas një marrëveshjeje të ndërmjetësuar nga SHBA-ja dhe Franca, që synon të lejojë njerëzit në të dy vendet të fillojnë të kthehen në shtëpitë në zonat kufitare të shkatërruara nga luftimet 14 mujore.
Sipas kushteve të armëpushimit, forcave izraelite mund të duhen deri në 60 ditë për t’u tërhequr nga Libani jugor, por asnjëra palë nuk mund të nisë operacione sulmuese. Kryeministri izraelit Benjamin Netanjahu tha se ai kishte udhëzuar ushtrinë që të mos lejonte banorët të kthehen në fshatrat afër kufirit.
Ndërkohë në Gaza kanë vijuar sulmet raketore kundër Hamasit. Vetëm disa orë pas shpalljes së armëpushimit mes Izraelit dhe Hezbollahut në Liban, ushtria izraelite intensifikoi bastisjet në Rripin e Gazës, të cilat shkaktuan të paktën 15 të vdekur dhe shkatërrime të tjera. Objektivat civile si kampet dhe shtëpitë e personave të zhvendosur janë shkatërruar. Sipas agjencisë Wafa, një fëmijë u vra nga bombardimet në shtëpinë e familjes së tij në lagjen Zeitoun të qytetit të Gazës.
Discussion about this post