Nuk është ndërmarrje, koncesion, as godinë apo fabrikë, por qëndron në det dhe…ha miliona euro. Gjëegjëza që krijoi Belinda Balluku, ministrja e Infrastrukturës dhe Energjisë, të bën të mendohesh dhe nuk e zgjidh dot lehtë. Janë dy TEC-et lundrues, që prej një viti e gjysmë ndodhen në Triport të Vlorës dhe i kanë emrat “Tigri 1” dhe “Tigri 2”.
Para se të largohej nga KESH, administratori Ergys Verdho (për një mision të ri), la peshqesh një tender për këto dy TEC-e, ku do të shpenzohen rreth 1.8 miliardë lekë.
Bëhet fjalë për tenderin me objekt “Sigurimi i asetit – TEC Lundrues”, i cili është hapur më datë 1 shkurt 2024 dhe pritet që fituesi do të shpallet më datë 7 mars 2024. Kontrata e sigurimit shkon afron 1.8 miliardë lekë. Shërbim ky që në fakt duhej të ishte përcaktuar në kontratën e qirasë që qeveria ka me kompanitë “Exelerate Energy” dhe “Renco”. Kjo kontratë nuk është bërë publike dhe mesa duket ky element i rëndësishëm nuk ka qenë i përfshirë. Por, ky tender është një pikë ujë para shpenzimeve të tjera marramendëse që kryhen për dy anijet.
7.2 milionë euro naftë tër TEC-et
Në fund të vitit 2023, KESH ka bërë edhe një tjetër shpenzim për dy ‘Tigrat’ që nuk vihen në punë sepse çmimi i energjisë së prodhuar është katastrofë. Në dokumentin e publikuar thuhet se, Korporata Elektroenergjetike Shqiptare ka shpallur kompaninë fituese që do të depozitojë dhe ngarkojë – shkarkojë lëndën djegëse për funksionimin e 2 termocentraleve lundrues në Vlorë.
Me një ofertë prej 7.2 milionë euro fituese u shpall “La Petrolifera Italo – Albanese”, që është gjithashtu mbajtëse e koncesionit të terminalit të përpunimit të naftës dhe nënprodukteve të saj, i pozicionuar në afërsi të 2 impianteve të gjenerimit të energjisë. Sipas njoftimit të fituesit, kontrata që do të lidhet mes KESH dhe kompanisë do të përfundojë në 30 nëntor të vitit 2025.
Ndërkaq, gara për lëndën djegëse të 2 TEC-eve lundrues nuk është hapur ende, teksa deri më tani në faqen online të KESH, është bërë shprehja paraprake e interesit.
Afera e Tigrit 1 dhe Tigrit 2
Që nga dita e ankorimit të tyre në Vlorë e deri më sot, këto termocentrale nuk janë vënë asnjëherë në punë, pavarësisht se taksapaguesi shqiptar paguan mbi 94 mijë dollarë në ditë qira, dhe kontrata parashikon që për dy vite kompania “Exelerate Energy” dhe “Renco”, që ka fituar tenderin, të fusë në xhep plot 68 milionë dollarë.
Kujtojmë se me propagandë të madhe të deklaruar nga Belinda Balluku, Arben Ahmetaj dhe Ergys Verdho, në fund të vitit 2022 u investua tek ky “projekt” me argumentin se, gjithçka bëhej për të siguruar burime energjetike alternative nga hidrocentralet publike, për të përballuar krizën e çmimeve dhe tharjen e kaskadës së Drinit. Pra, ‘tigrat” do të na mbronin në ditën e apokalipsit energjetik. Tenderi për TEC-et lundruese u shpall në fillim të 2022 dhe fituesi u shpall në pranverë. KESH investoi edhe 2.2 milionë euro të tjera për ndërtimin e infrastrukturës së aksesimit dhe ankorimit për TEC-et lundruese në portin e peshkimit Triport-Vlorë.
Sipas kontratës, “Tigri 1” dhe “Tigri 2” kanë ardhur nga Bangladeshi në Shqipëri shtatorin e vitit 2022 dhe çdo ditë kasaforta e ndryshkur e ‘tigrave’ mbushet me paratë e qeverisë.
Qeveria kishte venë si afat fillimin e vitit 2023 për futjen në operim të TEC-ve, ndërkohë që koha ka kaluar dhe qiraja është paguar pa i vënë centralet në punë. Pse nuk funksionoi “inovacioni” i qeverisë me Tigri 1 dhe Tigri 2 është e kuptueshme, por vetëm një lutje kemi: Mos e shtyni afatin e qirasë, se nuk kemi më mish për “tigrat”!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post