Një 29-vjeçar ka rënë në prangat e policisë së Tiranës pasi dyshohet se në bashkëpunim me të atin pastronte para me burime të dyshimta, duke i dhënë hua me përqindje, në biznesin e tij (exchange dhe argjendari), në Fushë Krujë. Armando Musteqja u arrestua pas një hetimi të nisur që prej tetorit të 2024-ës.
Sipas njoftimit të policisë, i riu dhe i ati i cili do të hetohet në gjendje të lirë dyshohen se shisnin bizhuteri floriri, të dyshuara të kontrabanduara, pasi nuk ishin të pajisura me fatura blerjeje.
Gjatë kontrollit të kryer blutë sekuestruan bizhuteri me peshë 1400.41 gramë dhe me vlerë 187 000 euro. Gjithashtu efektivët sekuestruan edhe 100 mijë euro (para cash).
“Si rezultat i një hetimi intensiv, të iniciuar nga Seksioni për Hetimin e Pastrimit të Parave dhe Aseteve Kriminale i DVP Tiranë dhe të ndjekur që prej muajit tetor 2024, me metoda proaktive, në bashkëpunim me Prokurorinë e Tiranës, u finalizua operacioni “Miniera”. Gjatë operacionit u arrestua në flagrancë shtetasi A.M., 29 vjeç dhe nisi procedimi në gjendje të lirë për babanë e tij, shtetasin A.M., 60 vjeç, të dy banues në Fushë Krujë.
Nga hetimet dyshohet se 29-vjeçari, në bashkëpunim me 60-vjeçarin, nëpërmjet biznesit të tyre exchange dhe argjendari, në Fushë Krujë, pastronte para me burime të dyshuara kriminale. Nga kontrolli, në ambientin e bizneseve u gjetën 100 000 euro cash që jepeshin hua kundrejt përfitimit (me përqindje). Gjithashtu, në këtë biznes shiteshin bizhuteri floriri, të dyshuara të kontrabanduara, pasi nuk ishin të pajisura me fatura blerjeje”, njoftoi policia.
“Vijojnë hetimet për të identifikuar dhe nxjerrë përpara përgjegjësisë penale, shtetasit e tjerë që mund të jenë implikuar në këto veprimtari kriminale. Materialet procedurale iu referuan Prokurorisë së Tiranës, për veprime të mëtejshme, për veprat penale “Pastrimi i produkteve të veprës penale ose veprimtarisë kriminale”, “Tregtimi dhe transportimi i mallrave që janë kontrabandë” dhe “Fshehja e të ardhurave””, shtuan të njëjtat burime.
Discussion about this post