Ndërron jetë ish-trajneri i njohur i Anglisë dhe Lacios, Sven-Göran Eriksson në moshën 76-vjeçare.
Eriksson ishte trajneri i parë jo-britanik i skuadrës së Anglisë, që udhëhoqi ‘Tre Luanët’ në çerekfinale në tre turne të mëdhenj gjatë periudhës së tij pesëvjeçare në krye midis 2001 dhe 2006.
Në janar Eriksson tha se i kishte “në rastin më të mirë” një vit për të jetuar pasi u diagnostikua me kancer.
Suedezi drejtoi 12 klube, duke përfshirë Manchester City, Leicester, Roma dhe Lazio, duke fituar 18 trofe.
Eriksson, vetëm pak ditë më parë, i dha një mesazh prekës lamtumire botës.
“Kam pasur një jetë të mirë, po. Mendoj se të gjithë kemi frikë nga dita kur vdesim, por duhet të mësosh ta pranosh atë. Në fund të fundit ka rëndësi të kesh qenë njeri i mirë në këtë botë. Jo të gjithë do ta thonë këtë për mua, por shpresoj të më kujtojnë si një njeri pozitiv.
Mos kini keqardhje, buzëqeshni! Faleminderit për gjithçka: trajnerë, lojtarë, tifozë! Ishit fantastikë. Kujdesuni për veten, kujdesuni për jetën tuaj dhe jetojeni atë deri në fund”, shkruante Eriksson.
Suedezi suksesin si trajner e ka shijuar në Itali gjatë viteve 1990, ku ishte trajner i Sampdorias dhe pastaj Lazios, ekip me të cilin e fitoi titullin e kampionit në edicionin 1999/2000.
Së fundmi, Eriksson ka punuar si drejtor sportiv tek ekipi i kategorisë së tretë suedeze, IF Karlstad, por që në shkurt të vitit të shkuar dha dorëheqjen për arsye shëndetësore.
Gjatë karrierës së tij si trajner, Eriksson ka punuar edhe te Fiorentina e Roma, ndërsa në total ka regjistruar 437 ndeshje në Serie A. Ai gjithashtu ka qenë edhe te Benfica, Manchester City, Leicesteri dhe disa skuadra kineze. Krahas Anglisë ka drejtuar edhe Meksikën, Bregun e Fildishtë dhe Përfaqësuesen e Filipineve.
Discussion about this post