Analisti Andi Bushati, i ftuar në emisionin “Të Paekspozuarit”, tha se arrestimi i kreut të opozitës, Sali Berisha, ishte një akt të pritshëm, në një vend me qeverisje autokratike, i cili ka ardhur pas shumë përpjekjeve të pushtetit për ta copëzuar opozitën.
Bushati tha se arrestimi i Berishës nuk do të jetë fundi i veprimeve arbitrare dhe se “makineria” e pushtetit, mund të ndalet vetëm kur ajo të rrëzohet.
“Kurba pak a shumë dihej, që me tentativat që bëri Rama për të përçarë opozitën. Po të bëjmë një retrospektivë të shkurtër, do të shohim tratativat për të ndarë opozitën. Pastaj një përpjekje për të nxjerrë ligj për spiunët, për të nxjerr Metën nga gara, pastaj përpjekje për ligj që kjo parti nuk lejohet të hyjë në zgjedhje. Pastaj u bë tentativë edhe për ligj që kush ka qenë Sekretar partie nuk lejohet të jetë te këto parti. Pastaj e lanë Berishën pa vulë, komisionerë, etj. Nuk mund të shkëputet burgosja e Berishës pa këto përpjekjet për ta thërmuar dhe atomizuar opozitën.
Në vende autokratike, kështu ndodh me opozitën, janë të atomizuara dhe nuk bëhen dot bashkë.
Problemi është, që e keqja nuk do të mbarojë këtu.
Kur mekanizmi diktatorial vihet në punë, makineria nuk ngopet dot më me viktima. I shoh edhe këto bashkë, atë që i bënë Belerit, gazetarit Qyno… Kur vihet një makineri që nxjerr jashtë loje të drejtën dhe ligjin, kjo makineri nuk di më të ndalet dhe vetëm pjell viktima të reja.
Në këtë kuptim, le të rrinte dhe Saliu në burg, po të ishte i fundit. Por nuk është i fundit, sepse makineria është vënë në punë dhe ajo ndalet vetëm kur të ndalet ajo që e ka prodhuar”, tha Bushati.
Discussion about this post