Viti 2021 u mbyll me një numër të lartë të papunëve në vendin tonë dhe reduktimi i papunësisë ka qenë i papërfillshëm. Në lidhje me këtë çështje ka folur gjatë një interviste televizive eksperti Erion Muça, i cili shprehet se ulja e papunësisë që u regjistrua gjatë sezonit të verës ishte e përkohshme.
Sipas tij, në fund të janarit do të përballemi me një realitet ndryshe. “Viti 2021 pati luhatjet e veta dhe efektet për të stabilizuar efektet e vitit 2020. Pati fokus dhe prioritet infrasktrutura, ndërtimin, sektorë që supozohej të sillnin rritjen e punësimit në vend, por realiteti nuk ishte ai që pritej, vetëm 3-mujorin e fundit kemi ulje të papunësisë, kjo përkon me rritjen e punësimit sezonal. Në fund të janarit 2022, papunësia do të ketë rritje tjetër duke mos arritur dhe kapur pritshmëritë e planifikuara për këtë vit nga ana e shtetit, 11.8% në total për të gjithë vitin”, tha ai.
Edhe bilanci i papunësisë për këtë vit sipas ekspertëve do të jetë thuajse në të njëjtat nivele me vitet 2019 e 2020 TAB, duke mos shënuar progres të kënaqshëm. “2021 nuk mjaftoi që tregu i punës në Shqipëri të stabilizohej, jemi ende larg sepse kemi ende luhatje qoftë të shifrave të papunësisë, qoftë të nivelit të të punësuarve në plan vjetor, jemi thuajse në të njëjtat shifra”, u shpreh eksperti. Por teksa nga njëra anë kemi biznese, që ankohen se iu mungon fuqia punëtore, papunësia mbetet e lartë dhe kjo për shkak të rrogave të ulëta si dhe të informalitetit të lartë.
Discussion about this post