Paralajmërimi i fortë i gazetares: 3 grupe kriminale janë bërë bashkë, urgjent të ndërhyjë shteti

Gazetarja e njohur e kronikës së zezë  Klodiana Lala ka bërë një paralajmërim të fortë, ku kërkon me urgjencë ndërhyrjen e shtetit.

Me anë të një postim në rrjetet sociale, Lala flet për atentatin ndaj Marklen Hakës dhe një atentat në Lezhë si motiv.

“Në emisionin ‘NE SHENJESTER’ kam trajtuar atentatin ndaj Marklen Hakës në shtator të 2019 në Nikël. Mes të tjerash kam deklaruar se ngjarja lidhet me një atentat mafioz që ka ndodhur në Lezhë disa kohë më parë ku viktimë mbeti një personazh shumë i njohur në atë zonë. Zyrtar vendor” shkruan ndër të tjerash gazetarja.

Ajo vijon me tej duke u shprehur se përplasja mes palëve po bëhet shumë e fortë, ku 3 grupe kriminale janë bërë bashkë dhe janë në konflikt me bosët e krimit në Nikël.

“Nëse shteti nuk ndërhyn urgjent, pasojat do të jenë të rënda”, paralajmëron gazetarja Lala.

Marklen Haka u plagos me armë më 21 shtator 2019. I dyshuar si anëtar i “Bandës së Niklës”, Marklen Haka ishte qëlluar me breshëri plumbash pranë fortesës së tij në fshatin Zezë të rrethit Krujë, por edhe pse vetë i shpëtoi plagëve të rënda, plumbave nuk mundi t’i shpëtonte halla e tij Shpresa Basha.