Paralajmërimi i fortë i Pampurit: Edhe në PS do të ketë të tjerë “non grata”

Deputetja e PD, Orjola Pampuri ka paralajmëruar se do të ketë personazhe të tjerë “non grata” edhe nga Partia Socialiste.

“Përgjatë të gjithë kësaj interviste kam përmendur korrupsionin që është përfshirë kjo qeveri dhe pa diskutim, sikurse e kemi dëgjuar shpesh të artikulohet, do të kemi edhe personazhe të tjerë “non grata” dhe nga Partia Socialiste”, tha Pampuri.

Në një intervistë për “Gazeta Shqiptare”, ajo ka komentuar ndër të tjera edhe konfliktin Berisha-Basha, duke i dalë në mbrojtje këtij të fundit.

“Çdo institucion ka rregulla të shkruara e të pashkruara. PD-ja ka një statut, në bazë të të cilit kryetari zgjidhet një herë në 4 vite me “një anëtar, një votë” dhe kjo gjë ndodhi, zgjedhjet u bënë, u mblodh kuvendi, zgjodhi Këshillin Kombëtar, ky i fundit zgjodhi me votë të hapur dhe me votë të fshehur kryesinë, pra çdo procedurë vijoi në bazë të statutit. Sigurisht, nuk mund të rikthehemi sa herë kemi pakënaqësi personale e të kërkojmë largimin e kryetarit të partisë. Kjo është absurde. Nga ana tjetër, as nuk mund të mendohet që të pushtohet një institucion e të përdorësh në përballje për inate personale”, shtoi deputetja.