Deputeti i zgjedhur i PD, Tritan Shehu, ka reaguar për situatën e krijuar në Afganistan, ku mesnatën e kaluar u largua edhe avioni i fundit amerikan.
Shehu shkruan në Facebook, se talebanët nuk do të mjaftohen me Afganistanin, por do të zgjerojnë ambicien e tyre “kanibaleske”, dhe se imazhi i NATO-s është cënuar.
“Pamjet trishtuese e paralajmëruese të ushtarit e fluturimit të fundit amerikan nga Kabuli dhe festës talebanë, nuk premtojnë asgjë të mirë!
Do të ishin të përafërta këto me një feste naziste në Berlinin e 1945!
Pa dyshim Boten e vlerave, demokracitë, liritë i presin tashmë periudha të vështira.
Imazhi i Perëndimit, NATO-s nuk është ai i deri tanishmi i sigurisë, së shpëtimtarit, mburojës së fortë, shpresës së madhe për njerëzimin progresiv; ai është cënuar”.
Sipas tij, shumë gjëra do të ndryshojnë në botë, por jo për mirë, ndërsa shton se “tragjeditë e kaluara në histori do të na përsëriten”.
“Fondametalizmi, ekstremizmi, radikalizmi, terrorizmi kanë marrë energji e kurajo.
Jo vetëm kjo në ato Emirate Islamike të Afganistanit, që “djajtë” e zinj do ta kthejnë në një plasdarmë për ato, si dhe në ferrin e një populli të tërë, por dhe me gjerë, duke u zgjeruar ambiciet e tyre “kanibaleske” e kërcënuar shumë më gjerë.
Askush nuk është i përjashtuar nga ky.
Së paku kjo për një kohë jo të shkurtër, deri sa Perendimi të vërtetojë të kundërtën!
Siç duket shumë gjëra do të ndryshojnë, jo për mirë në Botë”, shkruan ndër të tjera Shehu.
