Kosova mund të rrezikohet nga përhapja e variantit të ri të koronavirusit, Omicron që ka prekur tashmë shumë vende të botës.
Kjo sipas infektologëve që kanë bërë thirrje për vigjilencë sa i përket respektimit të masave mbrojtëse, pasi ende nuk dihet saktë shkalla e agresivitetit të këtij varianti të ri.
Infektologët po ashtu kanë thënë se institucionet duhet të vendosin masa të reja kundër Covid-19 duke pasur gjithmonë parasysh lëvizjet e virusit dhe situatën aktuale epidemiologjike. Deri më tani, në Kosovë nuk është konfirmuar asnjë rast me variantin Omicron.
Ministria e Shëndetësisë bëri të ditur më herët se gjatë një takimi të Komitetit për koordinim dhe vlerësim të situatës me pandeminë COVID-19, është diskutuar për variantin Omicron, dhe se do të bëhet rishqyrtimi i masave në fuqi dhe do të marren masa të tjera.
Më 26 nëntor, Organizata Botërore e Shëndetësisë tha se Omicron, që fillimisht u identifikua në Afrikën e Jugut, ishte “variant shqetësues”. Zyrtarët në Afrikën e Jugut kanë thënë se 90 për qind e rasteve të reja janë me variantin Omicron, që ka numër të madh të mutacioneve.
Discussion about this post