Paralajmëron Basha: Do përdorim çdo mekanizëm, përfshi edhe referendumin për ndryshimet Kushtetuese

Lulzim Basha paralajmëroi ndërmarrjen e çdo lëvizjeje për të kthyer votën te qytetari, duke mos përjashtuar as referendumet.

Basha tha se do të bashkëpunojë me cilindo që synon rikthimin e votës, që mbahet e mbyllur për shkak të atyre ndryshimeve kushtetuese të 2008-ës që e kanë çimentuar sistemin.

“Tani është koha, tani ne duhet të shikojmë drejt të ardhmes europiane”, iu drejtua Basha të pranishmëve në takimin që zhvilloi në Kamëz.

Ndërsa e konsideroi edhe procesin e primareve që aplikoi Rithemelimi për kandidatët në zgjedhjet e 14 majit, Basha tha se ata që sot bërtasin për votën dhe manipulimin, manipuluan ato proceset e brendshme, dhe shembullin e keni që nga Kamza.

Basha tha se listat e hapura është e vetmja mënyrë për ti dhënë fuqinë e votës qytetarëve.

“Qytetarët, rinia duhet të bëhet pjesë e vendimmarrjes politike. Duhet të shohim se cilat janë hapat që duhet të hedhim, që të folurin me bojkot ta ndryshojmë. Më 14 maj spikati mungesa e të rinjve. Jemi në një plagë të hapur prej kohësh që dhimbjen e bën edhe më keq vallja që hedh kundërshtari ynë politik. Kauza jonë është kombëtare dhe para se të drejtojmë gishtin tek manipulimet zgjedhore dhe bishtat e kësaj qeverie duhet ta drejtojmë edhe nga vetja jonë”, shtoi Basha.

Në vijim, ai u shpreh se të martën, Kryesia e PD-së do të diskutojë pikërisht me procesin se si duhet riorganizuar kjo parti, ndërsa nuk iu përgjigj një pyetjeje që iu drejtua nëse do të rikthehej ose jo në krye të kësaj partie.