Në protestën e sotme banorët e “5 Majit” duken më të revoltuar dhe kanë paralajmëruar se do të ndërmarrin akte ekstreme. Një prej tyre ishte Gjin Nikolli, i cili ka paralajmëruar se është i gatshëm të japë jetën tek shtëpia e tij në lagjen “5 Maji” të cilën shteti ka planifikuar t’ia shembë më 22 shkurt.
Në një prononcim për mediat Nikolli tha se ai do të futet në grevë urie e do të shtrihet buzë shtëpisë së tij. Sipas tij, shteti shqiptar kërkon viktima dhe ai është i gatshëm që flijohet i pari për banesën që e ka ndërtuar me mund.
“Ore nuk kam vendosur akoma, por unë do të nis grevën e urisë. Më 22 shkurt, shtrihem buzë shtëpisë time. Këta duan viktima, dhe meqë duan viktima, do bëhem unë i pari. Dy janë rrugët, ose më nxjerrin zvarrë, ose të vdekur”, tha ai. Pak më parë banorët shkuan tek pallatet që janë ndërtuar mbi tokat ku më parë ndodheshin shtëpitë e tyre, por janë përplasur me policinë, e cila nuk i lejon t’u afrohen ndërtesave.
Discussion about this post