Policia e Lezhës ka zhvilluar dy operacione gjatë 24 orëve të fundit për parandalimin e vrasjeve, armëmbajtjes pa leje dhe trafikimit të lëndëve narkotike, duke lënë në pranga katër persona.
Në një konferencë për mediat, kryepolici i Lezhës, Oltion Bistri, njoftoi se një vrasje është parandaluar pasi policia kishte siguruar informacione se disa të rinj po organizonin të kryenin një atentat, duke përdorur mina me telekomandë dhe armë zjarri, duke vënë në pranga tre persona.
Mark Lamkja, Nikoll Marku dhe Marie Marku, janë personat e arrestuar nga policia e Lezhës, pasi dyshohet se ishin organizatorë për një atentat.
Mësohet se gjithashtu, janë shpallur në kërkim Edmir Vlkashi, 31 vjeç dhe Hektor Ndoka 31 vjeç, pasi në bashkëpunim me njëri-tjetrin, kishin planifikuar të kryenin një vrasje në qytetin e Tiranës, për shkak të konflikteve të mëparshme në lidhje me prishjen e pazareve të drogës, jashtë shtetit.
Këta persona, si bazë për fshehjen e armatimit që do të përdornin për kryerjen e vrasjes dhe të të ardhurave të përfituara nga aktiviteti kriminal, kishin shfrytëzuar ambientet e banesës dhe të restorantit të Nikoll Markut.
Ndërsa Mark Lamkja, dhëndri i Nikoll Markut është kapur me armë zjarri pistoletë, gjatë operacionit, në përpjekje për të fshehur provat që u gjetën gjatë kontrollit të Policisë.
Si rezultat i kontrollit janë gjetur dhe sekuestruar në cilësinë e provave materiale 2 mina me telekomandë, me lëndë eksplozive C-4, 88.900 euro, 2 armë automatike me shënjestër optike, 2 kallashnikovë, 1 armë automatike model “Scorpions”, me silenciator me dy krehra, 1 armë zjarri pistoletë model “Glock”, me një krehër me 11 fishekë, fishekë luftarak, kapsolla detonatore, fitil zjarrrpërcjellës, 1 armë gjahu, 2 radio marrëse-dhënëse si ato të Policisë, 2 skafandra motori dhe 1 automjet.
Policia e Lezhës ka arrestuar po ashtu dhe 24-vjeçarin Vlash Shahini, i cili po transportonte drejt Tiranës një sasi prej 20 kilogramë e 600 gramë lëndë narkotike cannabis sativa, me qëllim shitjen e saj.
Discussion about this post