Paraqitja në SPAK, Luan Baçi zbulon arsyet

Deputeti i Partisë Demokratike, Luan Baçi ka dhënë një deklaratë për mediet para Prokurorisë së Posaçme për arsyet e paraqitjes.

Ai tha se është thirrur për të dëshmuar në lidhje me një gjyq me kryetaren e Bashkisë së Roskovecit, Majlinda Bufi.

“Jam këtu për një gjyq me kryetaren e bashkisë së Roskovecit Bufi. Bufi më akuzon se është në ankth nga statuset që kam bërë duke marrë në mbrojtje banorët e Roskovecit”, tha ai.

Lidhur me një kallëzim të bërë më herët ndaj tij, Baçi u shpreh se çështja është mbyllur.

“Atë që japin mediet të një kallëzimi të bërë vite më parë është çështje e mbyllur. Pushimin e çështjes madje e kam marrë nga mediet”, tha ai.

Në një emision televiziv disa muaj më parë, ai foli për këtë rast.

“Në SPAK kam qenë dhe unë, më ka marrë në telefon një oficer i SPAK dhe më tha duhet të vish për një deklarim. Shkova deklarova. Më thirrën për një denoncim të bërë për mua nga një patronazhist nga Fieri, që thoshte se s’kam deklaruar të ardhurat. Ka nja tre katër muaj… SPAK kishte marrë denoncimin, kishte marrë dokumentacionin e hapi dosjen dhe mori deklarimin nga unë. Më tha sa prona ke, i thashë kam këtë këtë…”, tha Baçi në Tetor 2023.