Vijojnë paraqitjet pozitive të futbollistëve kuqezi që aktivizohen me klubet e tyre respektive, duke dhënë kontribut të rëndësishëm dhe duke konfirmuar formën e mirë në arenën ndërkombëtare.
Ylber Ramadani ishte protagonist absolut me Lecce-n në përballjen ndaj Lazios, e cila u mbyll në barazim 0-0. Mesfushori i Kombëtares zhvilloi një ndeshje shumë të mirë, duke u vlerësuar për sigurinë dhe ekuilibrin në mesfushë, ndërsa në përfundim të takimit u shpall lojtari më i mirë i ndeshjes.
Paraqitje shumë të mirë zhvilloi edhe Arber Hoxha në Europa League. Futbollisti i Kombëtares kontribuoi me asist në fitoren e thellë 4-1 të Dinamo Zagreb ndaj FCSB, duke qenë aktiv dhe i rrezikshëm në fazën ofensive gjatë gjithë takimit.
Kontribut vendimtar dha edhe Arbnor Muja me St. Truiden. Sulmuesi kuqezi asistoi në fitoren e rëndësishme 2-1 në transfertë ndaj RAAL La Louviere. Ky sukses e çon skuadrën e Mujës në kuotën e 45 pikëve, në vendin e dytë të renditjes, vetëm një pikë larg kreut.
Edhe Cristian Shpendi la gjurmë me Cesena-n, pavarësisht humbjes 1-2 në shtëpi ndaj Barit. Sulmuesi kuqezi asistoi përkohësisht golin e barazimit në minutën e 60-të, duke shënuar asistin e tretë në kampionat për këtë sezon. Shpendi numëron gjithashtu edhe 8 gola në kampionat.
Lajm pozitiv për Kombëtaren ishte edhe rikthimi i Nedim Bajramit nga dëmtimi. Mesfushori u aktivizua për disa minuta me Rangers në fitoren 3-0 ndaj Dundee FC, duke u rikthyer në fushë pas 10 ndeshjesh mungesë për shkak dëmtimi.
Titullare me klubet e tyre këtë javë ishin gjithashtu edhe Thomas Strakosha, Mario Mitaj, Berat Gjimshiti, Qazim Laçi dhe Armando Broja.
Discussion about this post