Këshilli Bashkiak i Tiranës ka vendosur dhënien e një huaje prej 197,000,000 (njëqind e nëntëdhjetë e shtatë milionë) lekë në favor të firmës “Tirana DC”, e cila është në pronësi të bashkisë.
Sipas asaj që shkruhet në vendim, këto lekë do t’i jepen me qëllim realizimin e projekteve të planifikuara dhe ushtrimin e veprimtarisë së saj. Duket se Erion Veliaj nëpërmjet kësaj firme, tenton kështu marrjen e parave të popullit, të cilat burojnë pikërisht prej taksave të këtyre të fundit.
Por çfarë po ndodh konkretisht?
Kompania në fjalë, pra “Tirana DC” është ndërtuar nga Këshilli Bashkiak, por sërish si krejt rastësisht pjesë e bordit të saj është Arbian Mazniku, miku i Erion Veliajt. Mazniku është ndër miqtë e ngushtë të kryetarit, madje duke e shënuar emrin e tij në bordero në pozicione të ndryshme pune.
Emrat e shënuar në krye të kompanisë së re janë Arbian Mazniku, Laura Deliu dhe Redi Molla, të 3 me pozicione drejtuese në Bashkinë Tiranë. “Tirana DC” është një kompani e themeluar në vitin 2020 ku kishte një kapital themelor rreth 400 mijë euro ose e thënë ndryshe 50 milionë lekë të reja.
Kjo kompani do të operojë në fushën e ndërtimit, nga projekti në letër e deri në përfundimin e tij. Pritet që po kjo firmë të bëjë dhe ndërtimin e banesave të shembura nga tërmeti në Bashkinë Tiranë.
Ndryshe nga bashkitë e tjera, rindërtimi i godinave të shembura në Tiranë, bëhet nga vetë bashkia, ndërsa në bashkitë e tera ndërhyn ministria. Duket se vetë qeveria i ka lënë dorë të lirë Veliajt për të bërë gjithçka ai do. Së bashku me grupin e vendosur në krye të kompanisë, me mikun e tij Maznikun dhe me “çelësat e kasafortës” së buxhetit të bashkisë, Veliaj vjel lekët e qytetarëve.
Tashmë duket qartë se socialisti ka në dorë gjithë kryeqytetin madje duke “devijuar” dhe ligjet të cilat janë njëlloj për këdo. Me anë të këtyre firmave ai bën qarkullimin e parave nëpërmjet buxhetit të bashkisë, por tek çdo kompani drejtuesit janë miq të tij.
Kujtojmë se dhe në tenderët e dhënë, pjesa më e madhe e tyre dyshohet se janë të paracaktuar e njëkohësisht pa garë.
